Бир не экиджыллыкъ, мийиклиги 150 сантиметрге джетген ёсюмдю. Саптагъайы къатыды, тюз ёрге ёседи, башырагъы
кёб бутакълыды. Чапыракълары чапыракъ бутакълада кёзюулю ёседиле, къыйырлары тишлидиле, гоккалары ууакъдыла,
акъдыла. Чапыракъла саптагъайны къойнундан ёседиле. Урлугъу
гаккы тюрюслю къудоручады, къара-къонгур бетлиди.
Июнь айдан сентябрь айгъа дери чагъыб турады. Урлугъу август-сентябрь айлада бишеди.
Акъ эчки ханс къургъакъ джайлыкълада, сыртлада, джол
джанлада, тюзледе, тикледе, къабыргъалада аслам болады. Баш
джанындан 15-20 сантиметр узунлугъуна кесиб алыб, салкъында, хауа джюрюген джерде кебдириб, джыяргъа керекди.
Къан тамырланы ичине туз джыйылса (артыкъсыз да джюрекни, мыйыны къан тамырларына), къан басымы кёлтюрюлсе, джебегине джетген адам, къаны уюб къалырча болса, бу
мардада джарашдырыб ичерге дурусду: бир уллу шай къашыкъ
бла ууакъланнган хансны алыб, юсюне джарым литр сууну къуюб, онеки сагъатны неда бир кечени къоюб, суу кисей бла
сюзюб, сюзюлмеден 100 миллиграммдан кюнюне 4 кере ичигиз.
Бу ханс уулу болгъаны себебли сагъыракъ болургъа керекди.
Айтылгъан мардадан чыкъмайын хайырланыгъыз.