Бу кюнледе КъЧР-ни Башчысы Темрезланы Рашид Къарачай районну Учкулан элинде физкультура эмда саулукъ бегитиу комплексни къууанч халда ачханды.

Физкультура эмда саулукъ бегитиу комплекс заманны излемине толу келишеди, анда Учкулан, Къарт-Джурт, Хурзук эллени адамлары спорт бла кюреширге боллукъдула. Эки этажлы мекям 1 минг квадрат метр джерни алады. Физкультура комплексде бюгюнлюкде эркин тутуш бла кюрешедиле, не тюрлю кереги бла санланы чыныкъдырырча зал барды, волейбол бла футбол секцияла да кёб турмай къураллыкъдыла. Мекямны арбазы да таб джарашдырылгъанды.
«Бу спорт комплекс ачылгъаны саулай элге, районнга да уллу къууанчды. Ёсюб келген джаш тёлюню саулугъуна къайгъырыу къралны баш борчуду. Аны юсюнден РФ-ны Президенти Владимир Путин да айтханлай турады. Спорт инфраструктураны болгъаны, спорт объектлени деменгилиликлери адамланы джашаулары, саулукълары бла къысха байламлыды.
2019-чу джылдан бери Къарачай-Черкесияда 70 спорт объект ишленнгенди, аладан 8-и физкультура эмда саулукъ бегитиу комплекследиле.
Бу джангы мекямда джаш тёлю бла бирге уллайгъан къауум, сабийлери болгъан юйдегиле да заманларын зауукълу ашырлыкъдыла деб ышанама. Спортну сюйгенлени, спортчуланы, районну, элни да джамагъатын бу комплекс ачылгъаны бла алгъышлайма. Барыгъызгъа да саулукъ-эсенлик, спортда джетишимле теджейме», - дегенди Темрезланы Рашид, къууанч джыйылыуда сёлеше.
Джыйылгъанланы алларында КъЧР-ни муфтийи, Шимал Кавказны Муслиманларын бирикдирген аралыкъны председатели Бердиланы Исмаил хаджи, Учкулан элни Къартларыны советини келечиси Биджиланы Магомед, эркин тутушдан спортну устасы Салпагъарланы Алим да сёлешгендиле. Ала бары да, элде спорт мекям ачылгъаны ючюн, республиканы Башчысына разылыкъларын билдире, андан белгили спортчула чыгъарыкъларына ышаннганларын айтхандыла.