Арттотур (апрель) айны 16-да Джёгетей Аягъы районда эсде къаллыкъ бир джарыкъ иш болду. Ол джазгъа аталгъан, ариулугъу джазны кесине ушагъан сохталаны тойлары эди.
«Весенний бал» дегенни айтыб школ джашауну ариу тукъум джасагъан бу адет бизни республикада кесине орун айыра барады. Мындан алда Джёгетей Аягъы районнга да ол кесин танытды. Анга себеб болгъанла районну школларыны директорларыны юретиу джанындан орунбасарлары, айхай да, тюз сохтала – школ коридорлада чабыб-джортуб айланнган сабийликден кёб болмай айырылгъан джашчыкъла бла къызчыкъла - эдиле. Омакъ чепкенле, джашчыкъланы уа боюнларында галстук орнуна джюрютюлген «бабочкалары», мангылайларына тёгюлген бурма чач джоппулары… Кийиннгенлери, кеслерин джюрютгенлери да XIX-чу ёмюрде, патчахны тукъумундан адамлача. Къысхасы, район аралыкъда орналгъан «Шафран» деген ресторанны омакъ залында бардырылгъан бу той эсде къаллыкъ къууанч болуб ётдю.
Эресейде аллай тойла (балла) Пётр I-чини заманында башланнгандыла. Аллай тойланы кеслерини джорукълары, адетлери (этикети), кийген кийимлери да анга кёре болгъанды. Тойгъа джангы къошулгъан джашла бла къызла (дамы и кавалеры) той тамаданы (церемониймейстер) башчылыгъы бла бир-бирлери бла танышхандыла. Той тамада, тойну программасын айта, хар кимни тепсете баргъанды. Сёз ючюн, XIX-чу ёмюрню ал сюреминде тойну полонез бла ачхан адет джюрюгенди. Тепсеуню башлагъанла патчах бла юй бийчеси неда къууанчны этдирген адам сыйлы къонакълары бла бирге болгъандыла. Аланы ызларындан экеу-экеу болуб башхала (хар ким кесини орнун билиб) тизилгендиле. Тепсеулени да хар бирини кеслерини джорукълары болгъанды. Сёз ючюн, Пушкинни заманында вальсдан башланнганды джашланы, къызланы бир-бирлери бла танышыулары. Бизни абезегибиздеча, джашла, ол кёзюуню мараб туруб, джаратхан къызларын вальс тепсеуге чыгъаргъандыла…
Биз хапарын айтхан джазгъы тойну хурметли къонакълары талай да бар эдиле: Борлакъланы Людмила – «Навигаторы детства» деген проектни бизни регионда координатору; Лещенко Светлана - Джёгетей Аягъы районну администрациясыны башчысыны орунбасары; Текеланы Лариса – Джёгетей Аягъы районну Окъуу бёлюмюню баш устасы; Тебуланы Жанна – Джёгетей Аягъы районну Окъуу бёлюмюню методика аралыгъыны тамадасы; Тулпарланы Фатима – «Навигаторы Детства» деген проектни устасы; районну окъуу организацияларыны директорлары эмда башхала.
«Джаш тёлю бла бардырылгъан быллай ишле къралыбызда алгъын заманлада болгъан тюрлю-тюрлю адетлени эсге саладыла, солууну, къууанч эте билиуню джангы мадарларын кёргюзедиле, абадан классланы сохталарына эстетика сезимлени сингдиредиле, ариулукъну, айбатлыкъны кёре билирге юретедиле», - дейди Джёгетей Аягъы районда юретиу джаны бла директорланы кенгешчилерини муниципал координатору Атабийланы Зухра.
Къууанчны ахырында окъуу учреждениелени тамадаларына, юретиу ишни къурагъанлагъа, «Навигаторы детства» деген проектни джашауда бардыргъанлары ючюн, бюсюреу къагъытла бердиле.
