Озгъан байрым кюн Шимал Кавказ кърал академияны мекямында Къарачай-Черкес Республиканы Джамагъат палатасы эмда адамланы психика джаны бла саулукъларын сакълауну хакъындан бирлешликни башчылыгъы бла джыйылыу болду.
Джыйылыугъа Москва шахардан (онлайн-конференц халда) психикаларындан джарсыулу адамланы саулукъларын сакълауну хакъындан бирлешликни тамадасыны орунбасары Полубаяринов Дмитрий, Къарачай-Черкес Республиканы Саулукъ сакълау министерствосуну эмда надзорну бизни республикада бёлюмюню къуллукъчулары, «Забота» интернатны башчылыгъы, Шимал Кавказ кърал академияны эмда Къарачай-Черкес Республиканы Джамагъат палатасыны келечилери, журналистле къошулдула.
Анда бюгюнлюкде джамагъатны ичинде кёрюнмегенликге, эм уллу орун алыб баргъан джарсыуланы бирини юсюнден сёлешдиле. Психикалары къыяулу, джанлары инджилген, кемизли адамланы джашауларын джакълау, аланы саулукъларын сакълау, психика эмда социал джаны бла алагъа болушлукъ этиу джыйылыуну баш мураты эди.
Былайда айтыргъа тыйыншлыды, хар джыл сайын «Другие?» деген фестивалны бардыргъанлай турадыла. Аны тамалында, башында сагъынылгъан ол къауум джарсыулу адамлагъа деб къуралгъан реабилитация программаланы джашаугъа сингдирирге, саулукъ сакълау учреждениеледен сора да, бирси кърал структурала да къошулуб, ол джууаблы, магъаналы джумушну мийик дараджагъа чыгъарыргъа кереклисин да чертиб сёлешдиле кенгешде.
Джанлары джарсыулу болгъан адамлагъа медицина эмда социал джаны бла къаллай болушлукъ этилгенини юсюнден психикасы бла нервалары ауругъан адамланы саулукъларын бакъгъан диспансерни баш врачыны орунбасары Чотчаланы Лаура къысха хапар айтды. Профилактика этген медицина аралыкъны баш врачы Байчораланы Энвер да, ол тукъум джарсыулу адамлагъа не джаны бла да болушургъа, профилактика джумушланы джылны ичинде талай кере этерге кереклисин билдирди.
Кенгешни тамамлай, быйыл аууз-герги (октябрь) айны 10-да Владикавказда бардырыллыкъ IX-чу фестиваль бла байламлы джумушланы юсюнден да сёлешдиле. Ала бла байламлы къуралгъан программаланы фестивалны тамалында хайырландырырча, аны бла да къалмай, аланы джашауда сингдире барырча мадарланы къураргъа эмда ала бла байламлы джумушланы контролун джуууаблы къуллукъчула алыб, джан аурутуб, алай кюрешселе кереклисин айырыб айтды Полубаяринов Дмитрий.
Джыйылыугъа келгенле джамагъатны ичинде джанлары джарсыулу болгъанлагъа уллу магъанасы болгъан джумушланы сюзерге болушхан бу кенгешни къурагъанлагъа джюрек разылыкъларын билдирдиле.
БАТЧАЛАНЫ Фатима.
