Кёб болмай Къарачай-Черкес Республиканы «Джаш тёлюню интеллектуал-чыгъармачылыкъ бирлешлиги» деген джамагъат организациясы «Австрияда Къарачай-Черкес Республиканы маданиятыны кюню» деген проектни джашаугъа кийиргенди.
Венада Илму бла маданиятны эресейчи аралыгъыны проектини тамалында джарыкъ концерт бардырылыб, халкъ усталаны къол ишлерини кёрмючю ачылгъанды. Ол ишге кёб адам баргъанды. Аланы арасында студентле, школчула, маданият бла санатны ишчилери, кёбчюлюк информация мадарланы къуллукъчулары, эресейчиле бла джергили джашагъанла эмда башхала болгъандыла.
«Бу проектни уллу магъанасы барды. Ол Къарачай-Черкесияны тыш къралла бла суратлау-хореография маданиятдан, тутхан байламын бегитирге юлюш къошады», - дегенди КъЧР-ни маданият министри Рамазан Бороков.
Анда бардырылгъан уллу концертге халкъ чыгъармачылыкъны уста бёлеклери къошулгъандыла. Ала Къарачай-Черкес Республиканы «Эльбрус» кърал тепсеу ансамбли, Къарачай-Черкесияны махтаулу артисти Байрамукъланы Аида, Фатима Китаева бла Агата Хорольская болгъандыла. Миллет макъамла согъула, джырла джырлана тургъанлай, миллет киийимлени кёргюзгендиле. Алайда халкъ усталаны къол ишлери да болгъанды. Аланы ичинде адамланы сейирсиндирген суратлау кюйюзле, кийизле, халыдан этилген кийимле, бёркле, алтын халы бла тигилген затла, суратлау чеканка, топуракъдан этилген затла, миллет чепкенле, джаулукъла, тюрлю-тюрлю миллет къобузла, сыбызгъыла, башха затла болгъандыла.
«Бу проект бизни республиканы тепсеу, джырлау санат чыгъармачылыкъ бёлеклерини усталыкъларын кёргюзюрге мадар бергенди. Аны тышында быллай проектлени джашаугъа кийириу Шимал Кавказны регионларын туристлеге сейир кёргюзюрюкдю, сатыу-алыучулагъа таблыкъ къурарыкъды», - дегенди Джамагъат палатаны члени Азамат Тлисов.
«Мен бу аралыкъда ишлегенли бери быллай сейир, адамны джюрегине учунмакълыкъ берген зат кёрмегенме. Къарачай-Черкесияны башчылыгъы бла андан келген келечилеге, быллай ашхы проект къурагъанлары ючюн, разылыгъымы билдиреме», - дегенди Венада Илму бла маданиятны эресейчи аралыгъыны тамадасы.
«Мен Москвадан Венагъа 25 джылны мындан алда кёчгенме. Быллай ишлени бек джаратама. Бюгюннгю бардырылгъан иш а, хар адамны джюрегине джол салгъан сейирликди. Мени кёзюм кёб ариу затха ачылды. Сизни энтда да Венагъа келиригизни сакъларыкъма», - деб хапар айтханды Татьяна Мохар.
ЛЕПШОКЪЛАНЫ Хусеин.
