Кёб болмай «Аланский древнехристианский центр на Северном Кавказе» деген республикан кърал учреждениени ведомствола арасы къауумуну джыйылыуу болду.  Ол джыйылыугъа КъЧР-ни Башчысы бла Правительствосуну Администрациясыны тамадасы Салпагъарланы Эльдар башчылыкъ этген эдиле.
Аны ишине Правительствону членлери, Къарачай-Черкес табигъат музейни-заповедникни, культура магъаналы объектлени сакълагъан управлениени къуллукъчулары къошулдула. Ала Тёбен Архыз комплексни мындан ары джарашдырыуну хакъындан оноу этдиле.
Бу аралыкъ КъЧР-ни Башчысыны бегими бла къуралгъанды. Россияны Президентини ШКФО-да Толу эркинликли келечиси Олег Белавенцев да аны джакълагъанды.

Джыйылыуда Шимал Кавказда бу аралыкъны къурауну, бегитиуню хакъындан проектни джарашдырыу бла байламлы программала сюзюлгендиле. Туризм бла джаш тёлю политиканы министри Эрикгенланы Анзоргъа «Развитие внутреннего и въездного туризма в Российской Федерации на 2019-2024 годы» деген программагъа Тёбен Архызда объектлени къошар мадарлагъа къараргъа буйрукъ берилгенди.