2018-чи джыл эндреуюк (декабрь) айны 21-де «Къарачай-Черкес Республиканы джаш тёлюсюню бирлешлиги» деб коммерция бла кюрешмеген автоном биригиу джаратылгъанды.
Джаш адамладан къуралгъан бу джангы биригиуню баш мураты джаш тёлю бла байламлы башламчылыкъ ишлеге не джаны бла да джакълыкъ этиудю.
Биригиуге Аджиланы Мустафаны джашы Мухаммат башчылыкъ этеди. Аны къурамына кирген адамла барысы да тутхан ишлеринде уллу джетишимлеге ие болгъанлары бла атларын джаш тёлюню ичинде кенг белгили этгендиле. Ким да билгенден, тамбла миллетге, республикагъа, къралгъа да бюгюннгю джаш адамла оноу этерикдиле. Аны амалтын ала не къадар билимли, акъыллы, оюмлу, ангылы, фахмулу, халал болсала, ол къадар игиди.
«Къарачай-Черкес Республиканы джаш тёлюсюню бирлешлиги» биригиуге кирген джаш адамланы хар бири, бюгюн огъуна джашауда энчи сокъмакъ салыб, таукел атлайдыла. «Бёрю атарны – бёркюнден» дегенлей, аланы миллетни джаш тёлюсюню ара ёзегине санаргъа боллукъду.
Алайды да, бирлешикни башчысы Аджиланы Мухаммат «Корпорация развития КЧР» АО-ну проектлерини тамадасыды, Къарачай-Черкес Республиканы Туризмини, курортларыны эмда джаш тёлю политикасыны министерствосуну джамагъат советини члениди.
Аджи улу аны кибик «Опора России» деген гитче эмда орта табышлылыкъны (предпринимательствону) Бютеуэресей джамагъат организациясыны Къарачай-Черкес Республикада джергили бёлюмюню табышлылыкъ бла байламлы джаш тёлю комитетине башчылыкъ этеди.
2018-чи джыл Мухаммат, джаш тёлю проектлени Бютеуэресей конкурсуна къошулуб, грантха ие болгъанды. Аны «Ярмарка инвестиций молодёжных бизнес-проектов» деген проекти Шимал Кавказ федерал округну эм иги беш практигини бирине саналгъанды.
Аны бла да къалмай, «Машук» деген Шимал Кавказ джаш тёлю форумда аны «VRGID Северного Кавказа» деген проекти, форумну тарихинде эм игилени бирине саналыб, Эресей Федерацияны Президенти Владимир Владимирович Путинни кесинден, Эресей Федерацияны Президентини Администрациясыны башчысыны орунбасары С. В. Кириенкодан, Шимал Кавказ федерал округну бютеу субъектлерини башчыларындан джакълыкъ табханды.
Белгилисича, бу форумгъа биринчи кере Эресей Федерацияны Президенти Владимир Путин да келгенин чертерге тыйыншлыды. Былайда Эресейни Президентине Аджиланы Мухаммат кесини проектини юсюнден хапар айтханды.
- Шимал Кавказны кластери джангы джарашдырылыб тебрегенди. Биз «VRGID Северного Кавказа» деген проектни джашаугъа сингдириб башлагъанбыз. Алай демеклик, биз, Шимал Кавказ федерал округну курортларын 360 градус форматха тюшюрюб, Интернетге кирген адамла къыйналмай аланы юсюнден толу хапар билиб, солургъа бери келирча этебиз. Бу ишни мындан ары да бардырлыкъбыз, турист презентацион фильмле салыр муратыбыз да барды, - дегенди Владимир Путиннге Аджи улу. Владимир Путин фахмулу джаш адамгъа проектин джаратханын айтханды эмда разылыгъын билдиргенди.
Озгъан джыл «Машук» деген джаш тёлю форум Пятигорск шахарда тогъузунчу кере бардырылгъанды. Джыл сайын ары Шимал Кавказны регионларындан сора да бютеу къралдан эм фахмулу, эм акъыллы джаш адамла джыйыладыла. Аланы бири Аджиланы Мустафаны джашы Мухаммат болгъанын ол кесини болуму, билими эмда хунерлиги бла танытханды.
Айхай да, Аджиланы Мустафаны джашы Мухаммат бютеу Къарачай-Черкес Республиканы джамагъаты ёхтемленирча бир уланды.
Рубриканы МАМЧУЛАНЫ Дина бардырады.
