Къарачай-Черкес Республиканы джамагъаты ёхтемленирча уланланы бириди Байрамукъланы Русланны джашы Расул. Ол кёб болмай къуралгъан «Къарачай-Черкес Республиканы джаш тёлюсюню бирлешлиги» деген коммерция бла кюрешмеген автоном биригиуню члениди.

Расул Шимал Кавказ кърал гуманитар-технология академияны студент советини тамадасыды, Къарачай-Черкес Республиканы джаш тёлюден къуралгъан сайлау комиссиясыны да члениди.

2018-чи джыл Байрамукъ улугъа бек джетишимли джыл болгъанды. 2018-чи джылны къыркъаууз (сентябрь) айында аны Шимал Кавказ кърал гуманитар-технология академияны студент советине башчы этиб сайлагъандыла. Озгъан окъуу джылны эсеблерине кёре Расул ШККъГТА-ны юрист институтуну 10 алчы студентини бирине саналгъанды.

2018-чи джылны (алтотур) март айында «Джаш активистлени Шимал Кавказ школун» джетишимли тауусуб чыкъгъанды. 2018-чи джылны арттотур (апрель) айында ООН-ну Пятигорскеде III-чю халкъла арасы моделини трибуналыны эм иги делегатына саналгъанды.

Байрамукъ улу озгъан джыл Москвада АНО-да «Правовое содействие – Астрея» деб айлыкъ юрист стажировкада болгъанды. Анда ол «Семейная медиация в РФ» деген илму-тинтиу ишин джетишимли джакълагъанды.

Ол, былтыр байрым (февраль) айда «Студенческий десант» деген Бютеуэресей акциягъа къошулуб, «Особое художественное изображение в литературном произведении специфики службы в органах внутренних дел» деген номинацияда биринчи орунну алгъанды.

Байрамукъ улу, озгъан джылны арттотур (апрель) айында Саратов шахарда «Актуальные проблемы реформирования современного законодательства» деген халкъла арасы илму-практика конференцияны ишине къошулуб, ючюнчю оруннга ие болгъанды.

«Российский союз молодёжи» бирлешликни Къарачай-Черкесияда джергили бёлюмю аны «Интеллект года» деген номинацияда саугъагъа тыйыншлы кёргенди.

2018-чи джыл Расул КъЧР-ни Башчысы Темрезланы Рашидни бегими бла Къарачай-Черкес Республиканы Башчысыны кърал стипендиясын алыб тургъанды.

Озгъан джылны эндреуюк (декабрь) айында ол проект менеджерлени хазырлагъан школну тауусуб чыкъгъанды.

2018-чи джылны аякъ сюреминде бизни республикада «Къарачай-Черкес Республиканы джаш тёлюсюню бирлешлиги» къуралгъанында, Расулну тыйыншлы кёрюб, аны къурамына алгъандыла.

Аны кибик ётген джылны эндреуюк (декабрь) айында Байрамукъ улуну джангыдан Къарачай-Черкес Республиканы джаш тёлюден къуралгъан сайлау комиссиясына сайлагъандыла.

Алайды да, студент улан кесини тенглерини арасында ашхы ишлери бла юлгюге айтырчады. «Джаш болса да, башды» деб, анычалагъа айтадыла халкъда.

 

 
{jcomments}