Мындан алда ишим болуб Зеленчук стансеге баргъан эдим да, анда асыулу тукъумлу бабушланы ёсдюрген «Зеленчук» фабриканы директору Дичкин Владимир Ивановичге тюбедим. Ушакъ эте келгенинде ол былай айтды:

- Москвада «Алтын къач - 2018» Бютеуэресей кёрмючге бизни фабрика да къошулгъан эди, диплом бла да саугъаланнганды. Биз кёрмючге бабуш эт элтген эдик да, бизни продукциябызгъа уллу багъа бердиле. Ол зат фабриканы коллективине мындан ары да джигер ишлерге себеблик этерикди. Бир кере бизни юсюбюзден газетигизде статья чыгъаргъан эдигиз, энтда мадарыгъыз болса, коллективни алчы адамларыны юслеринден «Къарачайда» чыгъарсагъыз мен да, ала да къууанныкъ эдик. Аланы кючлери бла 2018-чи джылны джетишимли тамамларыкъбыз.

Директорну айтханын эте, мен «Зеленчук» фабрикагъа бардым. Директор мени фабриканы бригадири Кольцова Ольга бла танышдырды.

- Биргеме келигиз, Шестакова Елена, Дронова Татьяна, Махинина Анна ишлеген бригъадагъа барайыкъ да, джигерлени къалай ишлегенлерине къарайыкъ. Ишлерин сюйген, билген адамладыла ала. Фабрикада кёбден бери ишлейдиле, - деди Кольцова Ольга.

Биз эшиклени ачыб, абадан бабушла тургъан цехге кирир-кирмез, мингден аслам болур эдиле, бары да бизни таба юрюлюб, бурууну къатына келиб, къычырыкъ эте, тохташдыла.

- Бабушла бизни таба нек юрюлгенлерин билирге излей болурсуз, айтайым. Аш излейдиле. Тоя билмеген бир джанладыла была. Бир джаны бла кёб ашагъанлары игиди: дженгил ёседиле, эт аладыла. Экинчи джаны бла аш беригиз деб къычырыб турадыла да, къулакъларынгы сынсытадыла. Алларында ашлары джокъду деб келмесин кёлюгюзге. Барды. Эшик ачылгъаны сайын бабушчула аш келтиредиле деб кёллерине келеди. Бусагъатдан къычырыкъ этгенлерин къоярыкъдыла аш келтирмегенибизни билселе, - деди бригадир Кольцова Ольга.

Кольцова Ольга айтханча болду: бабушла къычырыкъ этгенлерин къойдула. Биз алагъа аш бермезлигибизни ангылаб, ызларына бурулуб, аш къуюлуб тургъан тегенелерине кетдиле.

- Бу Шестакова Еленады, - деди Кольцова. – Фабриканы ветераныды. Аны къатындагъы Дронова Татьянады. Бабушчу болуб кёбден бери ишлейди. Махинина Анна уа коллективни сюйген адамыды. Фабрикада кёбден бери ишлейди. Бир да иги халиси барды. Мен билиб, ол бир кишиге да хыны сёз айтмагъанды. Иши бла, халиси бла да барыбызгъа юлгю болуб турады.

Бу цехде тургъан бабушла кёб турмай гаккы бериб башларыкъдыла. Алкъын джашдыла. Быладан эки-юч джылны гаккы алыб туруб, артдан къасабха берликбиз.

Абадан бабушла тургъан цехден сора биз эки-юч кюн толгъан бабуш балачыкъла болгъан цехге бардыкъ. Бу цехде, кёзюую джетиб, Киселёва Люда ишлей тура эди да, ол бизни кёрюб, аллына талай атлам этгенлей, бабуш балачыкъла, бирден аны ызындан юрюлюб, къычырыкъ эте, къатында тохтадыла.

- Былагъа эки-юч кюн болгъанды, - деди Киселёва Люда. – Меннге юреннгендиле да, мен чакъырсам къатыма келедиле, ары-бери къымылдасам, ызымдан айланадыла. Адам айырадыла. Къайсыгъыз болса да чакъырсагъыз, киши адам болгъаныгъызны билиб, орунларындан теберик тюлдюле.

Бу цехде эки кёзюу бла ишлейбиз. Бюгюн мени кёзюуюмдю. Былайда эки-юч мингден аслам бабуш балачыкъ барды. Беш айгъа дери мен къараб турлукъма алагъа. Беш ай толгъандан сора башха цехге берликме…

- Алчы цехлерибизге къараб бошадыгъыз, - деди фабриканы директору Дичкин Владимир Иванович. – Энди фабриканы аш хазырлаучу заводуна барайыкъ. Анда Полянский Сергей бла Салжаника Сергей ишлейдиле. Аладыла фабриканы бабушларын аш бла баджарыб тургъанла. Биз кесибиз мюрзеу ёсдюрмейбиз. Сатыб алабыз. Сатыб алгъан мюрзеуюбюзню - нартюх, будай, арпа болсун - была тартыб, джарма этедиле. Джармагъа керекли къошакъланы къошуб бабушлагъа беребиз.

Биз аш хазырлаучу заводну ичине киргеникде, тирмен ишлей тура эди.

- Биз кюн сайын талай тонна джарма этебиз, тартабыз, - деди заводну тамадасы Полянский Сергей. – Алайсыз 70 мингден аслам бабушха, бабуш балачыкълагъа аш джетдираллыкъ тюлбюз. Бабушлагъа кёб аш керек болады: мухар затладыла.

- Полянский Сергей бла Салжаника Сергей фабрикада кёбден бери ишлейдиле, - деди Владимир Иванович. – Ишлери джууаблыды. Кюн сайын кереклисича бир джарма хазырлаб турадыла.

Бу арт джыллада биз бабуш эт хазырлаугъа алай уллу эс бёлмейбиз. Биз бабушладан гаккыла алыб, аланы сатхан этебиз. Асыулу тукъумлу пекин бабушла болгъанлары ючюн, аланы гаккыларын къралыбызны кёб региону алады. Керек болса, бабуш балачыкъланы элчилеге да сатабыз. Бабушланы юч-тёрт джылдан кёб тутмайбыз. Гаккы аз бере башласала, къасабха бериб, этлерин сатабыз.

Башында айтханымча, бусагъатда ишибиз къурамлы барады. Артыкъ да бек «Алтын къач – 2018» Бютеуэресей кёрмючде диплом алгъанлы, кёлюбюз джарыкъ болуб, барыбыз да иги ишлерге учунуббуз.

КЪОБАНЛАНЫ Махмут.