Кёб болмай Къарачай-Черкес Республиканы Теберди шахарында «БИЗНИ ЮЙГЕ ИГИЛИК» деген джыйылыу болду.

Аны Къарачай-Черкес Республиканы Миллет ишлерини, кёбчюлюк коммуникацияла бла басманы хакъындан министерствосу бла бирге Къарачай-Черкес кърал университет къурагъан эдиле. Форумну ишине къошулгъанланы арасында, миллет, дин, джаш тёлю, башха джамагъат бирлешликлени чыгъармачылыкъ союзланы, Къарачай-Черкесияны кърал муниципал къуллукъчуларыны келечилери эмда башхала бар эдиле.

Джыйылыуну ишин ача, министрни атындан, аны орунбасары Сергей Гузко джыйылгъанланы алгъышлады.

«Бюгюн сизге уллу магъаналары болгъан сорууланы сюзерге тюшгенди. Адамла бир-бирлерин ангылаб рахат джашау къурасала, ол заманда чыгъармачылыкъгъа, республиканы джамагъатыны ёсюмюне да терен эс бёлюрге тынч болады», - дей Сергей Гузко джыйылгъанлагъа тутхан ишлеринде джетишимле теджеди.

Проектни джетишгенине, джетишмегенине къараучу Къарачай-Черкес кърал университетде окъуу санагъатда педагогика бла этнокультура тинтиуледен илму лабораторияны тамадасы Къойчуланы Айтек айтхандан, бардырылгъан ишни баш мураты КъЧР-де халкъланы бирикдириу джанындан эмда динде тюрлю-тюрлю къарамлары, иманлары болгъан граждан джамагъат институтланы этген ишлерини ахыр эсеблерин чыгъарыуду.

Джыйылыуда миллетле, бир-бири бла биригиб ишлерча соруулагъа къаралды. Илмуну, окъууну, маданиятны, сатыу-алыу ишлени ёсюмлерине  аталгъан проектлени презентациялары да  болду.

Форумну аягъында джыйылгъанла резолюция алдыла. Анда айтылгъан затла, джаш тёлюню ариу халиге юретиуню, миллетле арасы шохлукъну бегитиуню, граждан обществону институтларыны ёсюмюню, джаш адамланы халкъланы  маданиятлары бла шагъырей этиуню, башха затланы юслеринден эдиле.

 

(Бизни корр.).

 

 
{jcomments}