Быйыл аууз-герги (октябрь) айны 27-си бла 28-де Минги-Тау» деген аты бла джаш дизайнерлени халкъла арасы тогъузунчу конкурсу боллукъду. Ол Черкесск шахарда Шимал Кавказ кърал гуманитар технология академияда ётерикди.

Конкурсха къошулургъа АБШ-дан, Франциядан, Австралиядан, Къытайдан, Индиядан, Турциядан, Вьетнамдан, Армениядан, Болгариядан, Беларусдан, Москвадан, Санкт-Петербургдан, Екатеринбургдан, Белгороддан, Краснодардан, Дондагъы Ростовдан, Таганрогдан, Набережные Челныдан, Ставрополь крайдан, Татарстандан, Къабарты-Малкъардан, Адыгеядан, Терк Башчы Тегейден, Дагъыстандан, Ингушетиядан, Анападан, Армавирден келликдиле.

Творчество джаны бла фахмулу джаш тёлюню ёсдюрюрге болушуу, дизайн джаны бла джаш устала хазырлау, миллет санатны айнытыу, Эресей бла тыш къраллы баш окъуу юйлени араларында шохлукъ байламлылыкъ бла иш джюрютюулени ёсдюрюу - ма быллай борчланы толтурлукъду
«Минги-Тау» деген халкълаарасы конкурс.

Конкурсну къурайдыла: Церетели Зураб - Эресейчи Суратчыланы академиясыны президенти; Бобыкин Андрей - Эресейчи Суратчыланы академиясыны вице-президенти, Дизайнерлени бирлешлигини халкъла арасы ассоциациясыны президенти; Къочхарланы Руслан - Дизайнерлени бирлешлигини халкъла арасы ассоциациясыны сыйлы члени.

Проектни башчысы Шимал Кавказ кърал гуманитар технология академияны дизайн эмда санат факультетини деканы, Эресей Федерацияны маданиятыны махтаулу къуллукъчусу Атайланы Лариса. Конкурсха къошулургъа чакъырыладыла: орта школланы тамада классларыны сохталары, орта усталыкъ берген профессионал-техника училищелени окъуучулары, РФ-ны Къыбыла, Шимал Кавказ федерал округларыны, Эресейни эмда тыш къралланы баш окъуу юйлерини студентлери. Конкурсха очно, заочно окъугъанла да къошулургъа боладыла.

Конкурсха къошулургъа излегенле заявкаларын 2018-чи джыл аууз-герги (октябрь) айны 20-на дери берирге керекдиле. Конкурсну бардырыллыкъ джери: Эресей, КъЧР, Черкесск шахар, СевКавГГТА, Ставропольская орам, 36.