Багъалы джердешле! Барыгъызны да Къарачай халкъны джангырыууну кюню бла таза джюрекден исси алгъышлайбыз!
Бу кюн къыйынлыкъгъа чыдагъанлары, кёлсюзлюк этмегенлери эмда тюзлюк хорларына ийнаннганлары кёчгюнчюлюк зулмулукъдан джарсыгъанлагъа кюч-къарыу бергенлерине шагъатлыкъ этеди. Къазауатны, кёчгюнчюлюкню къыйынлыкъларын сынаса да, уллу къоранчланы кёрсе да, къарачай халкъ, сакълагъан муратына джетиб, 1957-чи джыл хычаман айны 3-де туугъан джерине къайтханды. 14 джылны тышында ётдюрген мингле бла адамлагъа ол кюн къыйынлыкъгъа тёзгенлери бла аны хорлагъанларыны сыйлы саугъалары болгъанды.

Къарачайлыла, Кавказгъа къайтхандан сора, Къарачай-Черкесияны кёб миллетли юйюрюню башха миллетлери бла бирге республиканы экономика, социал эмда маданият ёсюмюне тыйыншлы юлюш къошхандыла. Эм магъаналысы – буруннгуларыны маданият терекелерин келир тёлюлеге сакълай эмда бере билгендиле.
Бу байрым кюн хар юйдегиге рахатлыкъ, урунууда джангы хорламла, ашхылыкъла теджейбиз!