Ол, къралны башчысыны Чакъырыууну юсюнден оюмун айта, «бу документ регионал дараджада ишде башчылыкъгъа тутаргъа тыйыншлы документди», дегенди.
Президентни Чакъырыуу, къысха болджаллы эмда узакъ болджаллы борчланы белгилеб, аланы толтурууну джолларын кёргюзгенин черте, Темрезланы Рашид: «Анда саулукъ сакълауну, билим бериуню, культураны, спортну, аны кибик башха санагъатлада, 2018-чи джылдан башлаб, узакъ болджалны ичинде баджарылыргъа керекли ишлени тизимлери белгиленедиле. Аланы ичинде, айхай да, баш орунланы аналыкъ бла сабийликни къоруулау, адамланы джашауларын созуу ишле аладыла», - дегенди. Къарачай-Черкесияны Башчысы Россия Федерацияны Президентини аллыбыздагъы алты джылны къралны шахарлары бла эллерин джарашдырыуну джыллары этерге чакъыргъанына да учунмакълыкъ бла тюбегенин айтханды.
«Къарачай-Черкесияда 2018-чи джыл Шахарла бла эллени джарашдырыуну джылы этилиб баямланнганды. Аны бла да къалмай, биз регионал эмда джергили магъаналы джолланы тыйыншлы дараджагъа чыгъарыргъа керекбиз. Нек десенг, аны магъанасы бек уллуду. Бюгюнлюкде федерал джолла тыйыншлы дараджададыла. Регионал эмда джергили джолла уа бек къолайсыз халдадыла. Адамла рахат, къоркъуусуз джюрюрча этер ючюн, Путин Владимир джолланы джарашдырыугъа федерал, регионал, джергили бюджетледен аслам ачха бёлюннюгюн излейди кесини Чакъырыуунда», - дегенди Темрезланы Рашид.
Аны бла бирге регионну Башчысы Президент кесини Чакъырыуунда адамлагъа мекямла ишлеуню мындан ары да тири бардырыллыгъын излегенин айтханды. Ол билдиргенден, Президент бу затны юсюнде да уллу борчла салады бизге толтурургъа. Алай а, Къарачай-Черкесияны Башчысы бирлемей-экилемей чертгенден, регион ол джаны бла планларын артыгъы бла толтурады. Бюгюнлюкде, дегенди ол, Къарачай-Черкесияны адамлагъа мекямла ишлеуде джетишимлери орта россия кёргюзюмледен уллудула.
Темрезланы Рашид къралны Президентини хар субъектде джаш тёлюге культура, музыка билим берген аралыкъла къураллыкъларын излегенин да тюзге санагъанын билдиргенди.
«Президентни Чакъырыуунда аллыбызда алты джылда саулукъ сакълаугъа бёлюннген ачханы да эки кереге ёсдюрюллюгю изленеди. Ол бек орунлу излемди, мени сартын. Кертисинде да, Чакъырыуда айтылгъаныча, джюз адамдан экиджюз адамгъа дери джашагъан эллени хар биринде врач амбулатория неда фельдшер-акушер пункт болургъа керекди. Мен акъыл этгенден, Россия Федерацияны Правительствосу марда-закон-джорукъ документ джарашдырыргъа керекди. Ол документ къолубузгъа тюшгенлей, регионал дараджада ол затланы толтурууну оноуларын этерикбиз», - дегенди дагъыда КъЧР-ни Башчысы.
Ол айтхандан, россиячыланы ёхтемленир чурумлары кёбдюле.
«Биз къачан да уллу кърал болгъанбыз, бюгюн да алайлай турабыз. Аны юсюнден Президент да айтды. Ол айтханны биз кёзюбюз бла кёрюб да къууандыкъ. Хо, биз кючлюбюз, аны бла ёхтемленнген да этебиз. Алай а эм баш зат, аны юсюнден Президент да айтды, бизни къралыбыз неден да алгъа адамлары бла кючлюдю», - деб да чертди республиканы Башчысы.
Ол билдиргенден, КъЧР-ни Правительствосуну членлери, толтуруучу властны, закон чыгъарыучу властны федерал къуралышларыны, муниципал районланы башчылары да къошулуб, аллыбыздагъы джууукъ заманда джыйылыу болуб, анда Россия Федерацияны Президентини Чакъырыуунда айтылгъан затланы толтурууну «джол карталары» салынныкъдыла. Ызы бла да анда белгиленнген затла джашауда орун алырча этилиб тебренникди.
