КъЧР-ни Башчысы Темрезланы Рашид мындан алда Псыж элде джангы Джарыкълыкъ юйню хайырланыугъа берилгени бла элчилени алгъышлагъанды. 

Аны къууанч халда ачхан сагъатда элчилени алларында сёлеше, бу ашхы иш элни, Абаза районну, бютеу Къарачай-Черкесияны да социал-экономика ёсюмюн танытхан бир атлам болгъанын чертгенди. Арт кёзюуде къуру Псыж элде талай ашхы тюрлениу болгъанды – эки джангы сабий сад, бир джарыкълыкъ-спорт комплекс ишленнгендиле, джолла джангыргъандыла. Башында сагъынылгъан 500-квадратметрлик джарыкъ мекям алгъыннгы эски клубну орнун алгъанды.
- Бу Джарыкълыкъ юйню къурулушуна къошулгъан адамланы барына да разылыгъымы билдирирге излейме – элге аламат саугъа этгендиле ала. Бу объект ётген джылны ичинде ишленнген эмда реконструкцияны кючю бла джангыртылгъан 12 культура объектни бириди. Быйыл республикада энтда 9 джангы Джарыкълыкъ юй ишленникди. Алай бла акъырын-акъырын элчилени джашау болумларын игилендире барабыз, спорт бла, искусство бла кюреширге, окъургъа, ишлерге ала шахарчыла бла тенг мадарла табарча этерге тырмашабыз. Россия Федерацияны Президенти Владимир Владимирович Путин теджеген стратегиялы социал башламланы баш борчун быллай ишледе кёреме. Ол борчланы бизни регионда джашауда бардырыргъа кюрешебиз биз да, - дегенди Темрез улу.
2018-чи джыл Къарачай-Черкесияда Шахарла бла эллени джарашдырыуну джылы болгъанын энтда бир кере эсге сала, Башчы ол  къууанчда дагъыда былай айтханды:
- Бу болумда Абаза муниципал районда джашау иги джанына тюрленир ючюн, мындан ары да къарыуубузну аярыкъ тюлбюз. Биз ол ишни сизни бла - районну, элни адамлары бла - биргелей этерикбиз, айхай да. Барыгъызгъа да саулукъ-эсенлик, насыб, мелхум джашау теджейме, бу джангы Джарыкълыкъ юй да, элчилени къууандыра, кёб джылланы турсун.
Къууанчха джыйылгъанлары бла хайырлана, ол кюн Темрезланы Рашид Псыж элде джашагъан, ишлеген культура къуллукъчулагъа кеси къолу бла кърал саугъала да бергенди. Сёз ючюн, Псыж элни Джарыкълыкъ юйюню суратлау башчысы Джердисов Аскербиге «Къарачай-Черкес Республиканы культурасыны махтаулу къуллукъчусу» деген сыйлы ат аталгъанды. Аны кибик «Абазинка» деген сабий хореография ансамблни концертмейстери Чикатуева Оксанагъа эмда Джарыкълыкъ юйню концертмейстери Шавтикова Сонягъа Бюсюреу къагъытла берилгендиле. Алайда элчи артистле джыйылгъанлагъа аламат концерт программа да кёргюзгендиле.
«Устойчивое развитие сельских территорий на 2014-2017 годы и на период да 2020 года» деген федерал нюзюрлю программаны ышыгъы бла, КъЧР-ни Башчысыны да аманаты бла ишленнгенди Псыж элде бу объект. Аны 300 адамгъа орну болгъан уллу залы, хар неси да джарашхан сахнасы, бирси бёлмелери бардыла, тыйыншлы оборудование да салыннганды. Арбазы да таб джарашханды. Алайда сабийле ойнарча площадкала ачылгъандыла, арбазны тюз арасында ариу фонтан ишленнгенди. Къысхасы, бу объект элчилеге аламат саугъа болгъанды.
 
ЁЗДЕНЛАНЫ Якъуб.
 
 
{jcomments}