Джолланы джарашдырыугъа бизни республикада уллу магъана бериледи, адамла джолда чарпыусуз джюрюр ючюн, таймаздан джоллагъа къараргъа кереклисин КъЧР-ни Башчысы Темрезланы Рашид эсгертгенлей турады.
Ол затны эсге алыб, джолланы чарпыула аслам болуучу джерлеринде машинала къызыу баргъанларын тохтатыр ючюн, 162 тыйгъыч салыннганды – ала тюз джолну юсюнде иш этиб джарашдырылгъан хырттыладыла.
Аны кибик светофорла эмда кече джарытыучула да салыннгандыла. Айтыргъа, адамла аслам джюрюген, сохтала школгъа ётген джоллада 65 ётюучю джерле этилгендиле. Ала барысы да джангы миллет стандартлагъа джууаб этедиле.

Аны бла бирге, Джангы Джёгетей, Ючкекен, Чапаевское эллени, Зеленчук эмда Преградна станселени школларындан узакъ болмай джумгъан светофорла салыннгандыла.
Бу иш мындан ары да сериуюн боллукъ тюлдю. Быйыл энтда джылны аягъына джангы миллет стандартлагъа келишген 145 джолдан ётюучю джер джарашдырыллыкъды.
Кертиси бла да, арт кёзюуде республиканы кёб джеринде джолну бир джанындан бир джанына къоркъуусуз ётерча таблыкъла къуралгъанлары эсленеди.