Темрезланы Рашид Къарачай-Черкесияда трикотаж производствону ёсюмюню юсюнден оюмун айтыб сёлешгенди. Къарачай-Черкесияны география, табигъат эмда тарих энчилигин эсге ала, республиканы халкълары ёмюрлени эл мюлк бла кюрешгенлерин, анда малчылыкъ, джюнден этилген затла халкъ усталыкъланы ёсдюргенлерин айтханды.
«Экспертле билдиргенден, регионда 50 мингнге джууукъ адам къумач затла чыгъаргъан производствода урунадыла. Ала андан алгъан хайырларын маджалгъа санайдыла. Ол, тюрлю-тюрлю усталыкъланы санагъатларын санамай, республиканы ишлеген къауумуну 20 проценти чакълы бир болады.
Быйыл Къарачай-Черкесияда къумач затланы производствосу иги джюрюш алгъанды. Озгъан джылны бу заманы бла тенглешдирсек, дженгил промышленностда чыгъарылгъан, джер-джерге ашырылгъан товарланы объёму 40 процент болуб, 7 процентге ёсгенди.
Бизде чыгъарылгъан продукция бизни базарда эмда СНГ-ны къралларыны базарларында эм игилени бириди. 1914-чю джылдан башлаб а, Къарачай-Черкесияны предпринимателлери, бу санагъатны алчылары - Къытай бла Польша - бла эришиб, аладан артха къалмайдыла. Джыл сайын да Россия Федерацияда 56 минг тонна джууулмагъан джюн чыгъарылады. Шимал Кавказ федерал округ бу санагъатда алчыды, саулай къралыбызда чыгъарылгъан джюнню 45 процентге джууугъу анда чыгъарылады», - деб, регионну Башчысы бу санагъатха тыйыншлы багъа бергенди.
Темрезланы Рашид билдиргенден, юч джылны мындан алда Россияны Правительствосуну болушлугъу бла, Россия Федерацияда джангыз болуб, джюнню алгъан, тазалагъан, андан тюрлю-тюрлю затла этген «Квест-А» предприятие ишленнген эди. Бюгюнлюкде ол фабрикагъа джюнню, Шимал Кавказ федерал округну болгъан субъектлерини барындан да эмда Къыбыла округдан, Россияны башха регионларындан да элтедиле. Тыш къралланы адамлары да бу предприятиеге эслерин иедиле.
Республикабызны Башчысы чертгенден, бизникилеге джюнден этилиб джарашхан продукцияны экспорту бла импортунда болум бирча тюлдю. Джюн тыш къраллагъа дженгил кетеди да, кесибизни базарыбызда сырьё джетмейди. Аны бла байламлы Темрезланы Рашид тышына ийилген джюнню азыракъ этерге боллугъуну юсюнден сёлешди. Ол айтхандан, алай этилсе, бу продукцияны къралыбызгъа келгени азайыб, бизни чыгъарыучулагъа джакълыкъ боллукъду.
Ол дагъыда КъЧР-ни джеринде тикген, джюнден тюрлю-тюрлю затла этген машинала чыгъаргъан предприятие ачылса, анда оборудованиени 15 минг единицасы хайырландырылыб, иги боллугъун айтыб, ай медет, бир джангыз сервис аралыкъ да болмагъанын билдирди.
«Аллай предприятиелени ачыу, джюнден затла этген машиналагъа къараргъа керегини сорууларыны оноуун этгенден сора да профессионал устала хазырлауну тамалын да къурайды», - деди республиканы Башчысы.
Усталаны юслеринден андан ары сёлеше, Темрезланы Рашид алгъа элтген россиячы баш окъуу заведениелени текстиль производствогъа устала хазырлагъан окъуу базалары бирикдирилселе ашхы иш боллугъуну хакъындан айтды. «Ол заманда бу промышленность ёсерикди. Россиячы продукцияны бек излерикдиле. Дженгил промышленностну къуллукъчуларыны усталыкъларыны имиджи иги боллукъду. Къарачай-Черкесияда, Россия Федерацияда да аты айтылгъан трикотаж бизнес, юйдеги бизнес болуб, россиячы текстиль династия къурай, атасындан джашына кёчерикди», - дегенди КъЧР-ни Башчысы.
Темрезланы Рашид бла Денис Мантуров форумда келишиннген, Къарачай-Черкесияны производствосун ёсдюрюрге кёлтюргюч этерик талай кесаматха къол салдыла.
