Ата джуртну къоруулаучуну кюнюню аллы бла Къарачай-Черкесия аскер къаугъагъа къошулгъан аскерчилеге джети тонна гуманитар джюк ашыргъанды.

Айтыргъа, 34-чю мотоатыучу бригаданы аскерчилерине, ала бизден баргъан джашладыла, ичер таза суу, татлы суула, конфетле, татлы ашарыкъ затла, джылы кийимле джиберилгендиле.
Къарачай-Черкес Республиканы Башчысы Темрезланы Рашидни аманатына кёре къуралгъан штабны къайгъырыуу бла джыйылгъанды аскер къаугъагъа къошулгъанлагъа ашырылгъан кёзюулю джюк. Белгилисича, бу штаб спецоперациягъа къошулгъанлагъа эмда аланы юйдегилерине болушлукъгъа багъышланнганды.
- Сууланы тюрлю-тюрлюлерин, татлы ашырыкъ затланы, айтыргъа, алты тонна джюкню Эресей Федерацияны сенатору Салпагъарланы Ахмат бла Казаноков Крым эмда Кърал Думаны депутаты Ёзденланы Солтан джыйышдыргъандыла. «Бирикген Эресей» партияны «Джигит джылынсын» деген акциясына джууаб эте, биз аскерчилеге джылы кийимле да ашыргъанбыз. Аланы биргесине консервала, татлы ашарыкъ затла, шайлыкъ дегенча затла да бардыла. Адамла кеслери къоллары бла этген джылы джюн кийимлени да келтиргендиле. Бизни рахатлыгъыбызны сакълагъан джашла джылынсынла, ала инджилмез ючюн, биз къолубуздан келгенни аярыкъ тюлбюз, - дегенди «Бирикген Эресей» партияны регионал бёлюмюню исполкомуну тамадасы Джамбаланы Руслан.
Спецоперация башланнганлы бизни республикадан аскерчи джашлагъа 1000 тоннадан аслам болушлукъ ашырылгъанды. Болушлукъ Эресейни къурамына джангы кирген регионлагъа да табдырылгъанлай турады. Бу ишге Къарачай-Черкесияны джамагъаты тири къошулады, бир джанындан къараб тургъан джокъду, деген уллу джангыллыкъ тюлдю.