Байрым айны 23-де, Ата джуртну къоруулаучуну кюнюнде, Черкесскеде Хорламны паркында Джигитлени аллеясына гокка хансла салыугъа аталыб джыйылыу ётгенди. 

Анга КъЧР-ни Башчысы Темрезланы Рашид бла РФ-ны билим бериу министри Сергей Кравцов къошулгъандыла.Аланы ызы бла республиканы Правительствосуну къуллукъчулары, джорукъ сакълагъан органланы, кърал эмда муниципал властланы, джамагъат бирлешликлени келечилери, «Защитники Отечества» фондну къуллукъчулары да салгъандыла Ёмюрлюк отну къатына гокка хансла.
«Ёлгенлеге сый беребиз. Бюгюнлюкде Ата джуртубузну къоруулагъанлагъа, багъалы ветеранларыбызгъа бюсюреу этебиз.
Ёсюб келген джаш тёлю Уллу Ата джурт къазауатны ветеранларыны, интернационалист аскерчилени, бюгюнлюкде спецоперациягъа къошулгъанланы джигитликлерин унутмазгъа, алагъа сый берирге керекдиле. Къралыбыз хорламлагъа аскерчилерибизни ётгюрлюклери, джигитликлери бла тыйыншлы болуб келгенди. Хорлам бизники боллугъуна ышанама», - деб джазгъанды КъЧР-ни Башчысы Темрезланы Рашид Телеграм-каналында.