Къарачай-Черкес Республиканы Башчысы Темрезланы Рашидни аманаты бла «Центр помощи по вопросам специальной военной операции» деген проектни тамалында Къарачай шахарда спецоперациягъа къошулгъанланы юйдегилери бла тюбешиу ётгенди.
Тюбешиуге Къарачай шахар округну мэри Орусланы Марат, РФ-ны Кърал Думасыны депутаты Ёзденланы Солтан, КъЧР-ни Халкъ Джыйылыууну (Парламентини) депутаты Байрамукъланы Ахмат, КъЧР-ни урунуу бла социал ёсюмюню министри Динара Камурзаева, Къарачай шахар бла Къарачай районну аскер комиссары Алакъайланы Джамбулат, Регионну управление аралыгъыны тамадасы Аппакъланы Ахмат, Эресейни Социал фондуну КъЧР-де бёлюмюню Къарачай шахарда клиент къуллугъуну тамадасы Биджиланы Любовь, Къарачай шахарны администрациясыны къуллукъчулары, тюрлю-тюрлю учреждениелени башчылары къошулгъан эдиле.
- Бу тюбешиу спецоперациягъа къошулгъанлагъа джораланнган выплатала, гуманитар болушлукъ, отпуска, реабилитация, алагъа медицина болушлукъ табдырыу бла байламлы ишлени сюзер ючюн къуралгъанды. Терен эс бёлюнюрге тыйыншлы сорууланы эсебге аллыкъбыз. Бизни баш борчубуз спецоперациягъа къошулгъанла бла аланы юйдегилерине болушлукъ этиудю. Ол джаны бла ишни мындан ары да бардырлыкъбыз. Барыбыз да бириксек, не тюрлю къыйын болумну да хорлар мадар табарыкъбыз. Ата джуртларын къорууларгъа ёрге тургъанланы хар бири бла ёхтемленебиз, - дегенди Къарачай шахар округну мэри Орусланы Марат.
Тюбешиуде аскерчилеге эмда аланы юйдегилерине джораланнган социал болушлукъ мадарланы юслеринден хапар айтылгъанды. Сёз ючюн, Эресейни Социал фондуну КъЧР-де бёлюмюню Къарачай шахарда клиент къуллугъуну тамадасы Биджиланы Любовь Социал фонд ол къауумгъа 20-дан артыкъ тюрлю-тюрлю социал болушлукъ табдыргъанын айтханды. Аланы арасында къаугъаланы ветеранларына, сакъатлагъа, аскерчилени сабийлерине пособие, сакъатлыкъ ючюн пенсия, ёлген аскерчини юйдегисине пенсия дегенча болушлукъ мадарла бардыла. Аны бла да къалмай, Социал фонд аскерчилени реабилитация керекле бла баджарады, санаторийлеге ашырады, тюрлю-тюрлю компенсацияла береди.
- Социал фондну аскерчилеге эмда аланы юйдегилерине джораланнган бир къауум кърал джумушлары тынчыракъ халда баджарыладыла. Сёз ючюн, аскерчилеге, мобилизациягъа тюшгенлеге, контракт бла къуллукъ этгенлеге, аланы юйдегилерине хар ай сайын берилген ачха тилек къагъытсыз тёлениб тебрейдиле. Аны бла байламлы оноу Социал фондха аскер комиссариатладан келген информациягъа кёре этиледи. Сабийлерине пособие берген заманда да мобилизацияны тамалында аскерге чакъырылгъанланы айлыкълары, башха хайырлары тергелмейди, - деб чертгенди Биджиланы Любовь.
Джыйылыуда башхала да сёлешиб, аскерчилеге, аланы юйдегилерине къаллай болушлукъ этилгенин ангылатхандыла. Аскерчилени юйдегилери да тюбешиуню къурагъанлагъа соруула бергендиле.
САЛПАГЪАРЛАНЫ Умар.
