Москва шахарда Тимирязев атлы РГАУ-МСХА-ны площадкасында аууз-герги (октябрь) айны 4-ден 7-не дери «Золотая осень - 2023» деген ат бла уллу кёрмюч къуралыб, ишин  Эл мюлкню эмда чыгъарыучу промышленностну ишчилерини кюнюне атаб бардыргъанды.

Ол Эресейни агропромышленность комплексини этген ишлерини арасында эм магъаналыланы, уллуланы бирине саналады. Аны ишине Эресей Федерацияны Правительствосуну Председатели Михаил Мишустин, Эресейни тюрлю-тюрлю регионларындан эл мюлк продукция чыгъарыучула, илму эмда окъуу учреждениелени келечилери, Къарачай-Черкесиядан республиканы эл мюлк министрини орунбасарлары Ижаланы Хусей бла Джамбулат Лехов, АККОР-ну тамадасы Чагъарланы Маджит, Ветеринар управлениени тамадасыны орунбасары Долаланы Асхат, «Колхоз-племрепродуктор» эл мюлкню тамадасы Борлакъланы Марина баргъандыла. Былайда эл мюлк санагъатны илму джетишимлери, джангы практика ишлери, инвесторланы джангы уллу проектлери, агробизнесге джораланнган финанс продуктала, заманны излемине толу джууаб берген джангы техника, эл мюлкню агъачлы малларыны иги тукъумлары болгъандыла.
Ала агропромышленность комплексни алгъа элтген компанияларыны презентацияларында павильонлада, орам экспозициялада кёргюзюлгендиле.
Михаил Мишустин пленар кенгешде сёлешиб, къралда база кёргюзюмле тыйыншлы дараджада, бир-бирлери уа, сёз ючюн, мюрзеу, шекер, эт, чабакъ, ханс джаула белгиленнген пландан артыгъы бла толгъанларыны юсюнден айтханды. Ол андан ары сёзюнде къралда 135 мелиуан тонна мюрзеу джыйыллыгъын, ол кесибизге, башхалагъа да джетеригин чертгенди.
Михаил Мишустин аграр санагъатда окъуу джаныны юсюнден айта, бу ишни школладан башларгъа кереклисин, адамлагъа таблыкъ къураргъа джораланннган кърал программаланы джашаугъа киргизиуге мындан ары да болушургъа тыйыншлы болгъанын айтханды.
Къарачай-Черкесияны эл мюлк министрини биринчи орунбасары Лехов Джамбулат Эресейни Правительствосуну тамадасыны эмда Эресейни аграр ведомствосуну тамадасыны аманатлары бизни регионда джашаугъа толусу бла киргизилликлерин айтханды. Ол республикада эл мюлк производствону продукциясын ёсдюрюр ючюн къой этден джангы кёб тюрлю зат этген цех ишлеб башлагъанын, аны бир джылгъа 25 минг тонна продукция чыгъарыр кючю болгъанын айтханды. Бу ишни бардыргъан компания бир кече бла кюннге, 80 тюрлю аты болгъан, 42 тонна продукция берлигин чертгенди. Андан сора, регионда Шимал Кавказ федерал округда эм уллуланы бири болгъан, 50 минг къойгъа джораланыб мал бакъгъан пункт ишлене тургъанын билдиргенди. Бу экинчи площадка болгъанын, 2024-чю джыл ишлеб башларыгъын хапарлагъанды.
Эресейчи агропромышленность санагъатны «Золотая осень - 2023» деген 25-чи юбилей кёрмючюнде санагъат конкурсла бардырылгъандыла, проектле сюзюлгендиле. Анда хорлагъанлагъа саугъала берилгендиле.
Къарачай-Черкес Республиканы Эл мюлк министерствосу билдиргеннге кёре, бюгюнлюкде эл мюлкде бир мелиуан экиджюз минг къой барды. Реестрге тюшген 400 мюлк къойла, эчкиле къураб кюрешеди. Республиканы Правительствосу джыл сайын эл мюлкчюлеге болушлукъ табдыргъанлай турады. Бизни республика Эресей Федерацияда джюн бериуден 5 онглу регионну бириди.
Бизде бусагъатда ашарыкъ чыгъарыучу промышленностну ишине терен эс бёлюнеди. Эл мюлкчюлерибизни продукцияларын тюрлю-тюрлю регионлада дагъыда башха джерледе кёрюрге боллукъду.