«Золотая осень» деген Бютеуэресей эл мюлк кёрмюч къралыбызны АПК-сында эм магъаналы ишлени бириди.
Эресей Федерацияны Эл мюлк министерствосу бу кёрмючню 1999-чу джылдан бери бардырады. Ол эл мюлк бла чыгъарыучу промышленностну ишчисини кюнюне аталыб джыл сайын аууз-герги (октябрь) айны экинчи ыйых кюнюнде бардырылады. Быйыл ол кёрмюч аууз-герги (октябрь) айны 4-ден 7-не дери К.А. Тимирязев атлы кърал аграр университетни джеринде къуралгъан эди.
Кёрмючню ишине кърал къуллукъчула, регионланы келечилери, эл мюлкчюле, алимле, башха устала да къошулгъан эдиле. Кёрмючню баш пленар кенгешинде РФ-ны Правительствосуну Председатели Михаил Мишустин да сёлешген эди.
«Золотая осень – 2023» деген 25-чи кере бардырылгъан эл мюлк кёрмючде магъаналы ишлени бири «Женщины в АПК» деген пленар кенгеш эди. Аны ишине РФ-ны Правительствосуну Председателини орунбасары Виктория Абрамченко, РФ-ны урунуу бла социал джакълыкъны министрини биринчи орунбасары ольга Баталина дагъыда башхала къошулгъан эдиле.
Кёрмючню тамалында «Женщины в АПК» деген Бютеуэресей конкурс бардырылгъанды. Аны баш нюзюрю эл мюлкге ёсюм алдырыуда тиширыуланы къыйынлары уллу болгъанын кёргюзюудю, аланы сыйларын чыгъарыуду, аны бла бирге эл мюлк санагъатны да кенгертиудю.
Быйыл да ол конкурс баямланыб, 4 номинациядан къуралгъан эди. «Кто, если не я?» деген номинациягъа элде джашау дараджаны игилендириу бла байламлы социал башламчылыкъны неда проектни теджерге боллукъ эди, «Превосходящая звезда» номинацияда АПК-да стартап-проектле кёргюзюле эдиле, «Суперженщина» номинация эл мюлк предприятиелеге башчылыкъ этиб, кеслерини ишлеринде джангы мадарланы хайырландырыб, производствону асыулулугъун ёсдюрген тиширыулагъа аталгъан эди. «Есть женщины в русских селеньях» номинация уа элледе социал магъаналары болгъан башламчылыкъланы къурагъан, джашауда кеслерине орун айыра билген тиширыулагъа аталгъан эди.
Конкурсха бютеу Эресейден 100-ден артыкъ адам къошулгъанды, ала 52 проектни теджегендиле. Хар номинацияда 3-шер адам хорламлы болгъанды.
Конкурсда хорламлы болгъанланы алгъышлау эмда саугъалау «Золотая осень – 2023» деген Бютеуэресей эл мюлк кёрмючню тамалында ётген эди. Анда «Суперженщина» деген номинацияда хорлагъаны ючюн сертификат бла эмда III-чю дараджалы диплом бла «Кубань» эл мюлк артелни правлениесини председатели Борлакъланы Марина саугъаланнганды.
Борлакъланы Марина аллындан «Кто, если не я?» деген номинациягъа кёзю къараса да, конкурсну комиссиясы аны «Суперженщина» деген номинациягъа къошханды. Сёзсюз да, быллай уллу конкурсда хорламлы болгъаны Маринагъа уллу сый-махтау бла бирге уллу джууаблылыкъ да келтиреди. Эл мюлкде ишлеген назик тиширыугъа къой, эркишилеге да къыйын тийгенин ким да биледи. Алай болса да Айбазланы Рамазанны къызы Борлакъланы Марина бёлек джылдан бери да кесини ишин джарыкъ бетден толтуруб, къолунда ишлегенледен, элчилеринден, башхаладан да бюсюреу табханлай келеди. Былайда чертерге излегенибиз, Маринаны хорламына къуру биз къууаныб къалмагъанбыз. «Мен бюгюн къонакъ болгъан «Золотая осень – 2023» форумда мени Джуртумдан бир ашхы джердешим, къарачай миллетни келечиси, намысны, адебни, ишленмекликни ашхы юлгюсю болургъа тыйыншлы тиширыу Борлакъланы Марина «Женщины в АПК» деген бютеуэресей конкурсну номинацияларыны биринде хорламлы болгъанына хакъ джюрегим бла къууаннганымы, ёхтемленнгеними айтыргъа излей эдим. Бизни гитче Къарачай-Черкесиябызны, сизни къарачай миллетни аллай къызы болуб, тамблагъы кюнюбюзге сагъыш этмезчабыз, деб келеди кёлюме», - деди редакциягъа телефон бла сёлешиб экономика илмуланы доктору, профессор, К.А. Тимирязев атлы кърал аграр университетни ветеранларыны советини председатели Юрий Агирбов.
БИЛЯЛЛАНЫ Фатима.
