Аууз-герги (октябрь) айны 9-да Къарачай-Черкесияны Башчысы Темрезланы Рашид быйылгъы республикан бюджетни джоюм этиу бла байламлы кесегин бусагъатха дери белгиленнгенден джараулуракъ хайырландырыугъа аталгъан кенгеш бардыргъанды.

Башчы джангы оноуну республиканы Халкъ Джыйылыууна (Парламентине) этген Чакъырыуунда белгилеген ишлени тыйыншлысыча баджарыр ючюн этгенди.
Быйылгъы республикан бюджетни джангы оноуу этилген кенгешде КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов да болгъандыла.
Кенгешде айтылгъаннга кёре, Къарачай-Черкесияны бюджети, арт джылладача, социал джумушланы баджарыугъа джораланнганды.
Тегаран, бюджетден саулукъ сакълаугъа айырыб аз тюртюлген, къыйын ауруу кючлеген джердешлерибизни дарманла бла баджарыугъа алгъындан эсе асламыракъ ачха чыгъарылгъанды.
Аны кибик, адамлагъа социал кёлтюргючлюк этиу бла байламлы бюджетге джангы статьяла къошулгъандыла.
Ол къошакъла республикан Ана капиталны ёлчемин 105,5 минг сомдан 150 минг сомгъа дери ёсдюрюрге, ючюнчю сабий туугъан юйдегилеге бир кереге болушлукъгъа берилиучю пособиени ёлчемин 35 минг сомдан 50 минг сомгъа дери кёлтюрюрге, кёб сабийли юйдегиледен хакъ тёлеб, колледжледе очно окъугъан студентлени джоюмларыны 50 процентин компенсация халда кеслерине къайтарыргъа, СВО-гъа къошулгъанланы юйдегилерине биринчи сабий туугъанлай огъуна республикан Ана капитал берирге джарарыкъдыла.
Бюджет ачханы алгъын белгиленнгенинден башхаракъ джораланнганыны себебинден, республиканы 960 орну болгъан, Ючкекенде ишлене тургъан эм уллу школу да къошулуб, социал объектлени къурулушларын тамамлаугъа къошакъ ачха берилликди.
Темрез улуну излеми бла оюлургъа джетиб тургъан эски юйледе джашагъанланы кёчюрюуге аталгъан программаны регионда мындан ары да толтурур мадарла этилликдиле.