Мындан алда Къарачай-Черкесияны Башчысы Темрезланы Рашид, Москвагъа барыб, Эресей Федерацияны Правительствосуну Председателини орунбасары Александр Новак бла тюбешгенди. Тюбешиуде ушакъ Архыз курортну ёсюмюню юсюнден баргъанды.

Темрезланы Рашид Александр Новакга «Архыз» курортну ёсюмю бла байламлы этилирге деб белгиленнген ишле къалай баджарылгъанларыны хапарын айтханды. Башчы Къарачай-Черкесияда аэропорт ишлетирге къагъыт чот джарашдырылгъанын да билдиргенди. Темрез улу ол объект ишлениб бошалса курортха баргъан-кетген табыракъ боллугъун да чертгенди.
Тюбешиуде «Архыз» курортну газ бла баджарыуну, анда къурулушлары бардырыла тургъан объектлени битдириб, быйыл хайырланыугъа бериуню юсюнден да сёлешиннгенди.
Архызны ёсюмюне аталгъан планнга кёре, 2027-чи джылгъа ол курортда 115 гектар джерде джарашдырылгъан 30 километр тау лыжа джол хайырланыугъа берилирге керекди. Андан 100 гектарда хазыр этилген тау лыжа джоллагъа къар себген системала салынныкъдыла. Ол заманнга «Архыз» курортда энтда да 6 джангы чынды джол ишлеб тебрерикди.
Белгиленнген план тыйыншлысыча толтурулса, Архызда тау лыжа джолланы бютеулей узунлукълары 57 километрге джете кетерикди, чынды джолла да 14 боллукъдула.