Къарачай-Черкесияны ара шахарында «Авангард» деген ат бла джаш тёлюню аскер-патриот ангысын ёсдюрюу бла сау джылны тохтаусуз кюреширик биринчи аралыкъ ачылгъанды.

Джангы аскер-патриот аралыкъны Ата джуртну джигитлерини кюнюне джоралаб къууанч халда ачхандыла.
Аны юсюнден Къарачай-Черкесияны Башчысы Темрезланы Рашид: «Бюгюн «Авангард» деген аралыкъны курсантларыны ал тизимине 30 джаш адам киргенди. Аланы кёб турмай 5-кюнлюк юрениу джыйылыулары боллукъду.
Бир джылны ичинде «Авангард» деген аралыкъда мингнге джууукъ джаш адамны аскер-патриот ангысын ёсдюрюр мадар барды.
Аны курсантларыны тизимине керти патриот джаш адамла кирирге излегенлерине, ала керек кюнде Ата джуртубузну дин-тин, маданият байлыгъын джакъларыкъларына, къралны аллында борчларын чалыкъламай толтурлукъларына ышанама», - деб джазгъанды кесини Телеграм-каналында.
«Авангард» деген аралыкъда сынамлы устала джаш адамланы аскер-патриот ангыларын ёсдюрюб, санларын чыныкъдырыб, аскер къуллукъгъа хазырларыкъдыла.
Джыл сайын андан минг курсант чыгъыб барлыкъды. Алай этилгени регионну джаш адамларын патриотлукъгъа кёллендирликди.
Аралыкъны ачылгъанына аталгъан къууанч джыйылыуда Къарачай-Черкесияны Правительствосуну Председателини орунбасары Дмитрий Бугаев: «Аскер-патриот аралыкъны курсанты болгъан бек уллу сыйды, аны джууаблылыгъы да уллуду. Бюгюнден башлаб сиз уллу джаш тёлю къозгъалыугъа къошуласыз. Аны ючюн, сиз, кесигизни аталарыгъыз-аналарыгъыз, устазларыгъыз ёхтемленирча джюрютюб, башхалагъа юлгю болургъа керексиз. Ата джуртубузну сюйюгюз, бир-биригизни да, сизни ёсюмюгюз бла кюрешген усталаны да сыйлай билигиз, аланы айтханларын эсге алыгъыз», - дегенди курсантлагъа.
«Авангард» деген аралыкъ Черкесск шахарны Красноармейская орамында 31-чи номерли мекямда орналгъанды. Аны практика ишле, маршла бардыра турурча джери да эркинди.

(БИЗНИ КОРР.).