Къач-къыш кёзюуде газ керекле тыйыншлысыча хайырландырылмагъанлары амалтын юйлеге от тюшгени кёб болады.

Арт кёзюуде газ баллонла атылыб, къралны джер-джеринде талай юйге заран джетгенди. Сёзден, Нижневартовск шахарда газ баллон асыры кючлю атылгъанындан юйню башы чартлаб тюшгенди. Быллай чарпыула таб ишлемеген газ кереклени хайырландыргъанлары амалтын боладыла.
Адамла, таб ишлегеннге санаб, газ кереклени джангыртыр заманда сан этмей тургъанлары да чарпыуланы бир чурумуду.
Белгилисича, кёб фатарлы юйледе газ сетле тыйыншлысыча джарашыб тюлдюле. Хар фатарда кёб газ джыйылмазча, хауаны сюрген, джангыртхан керекле (вытяжка, вентиляция) салыннганларыны себебинден, газ кесекчик-кесекчик чыгъа тургъанлыкъгъа юй оюлуб къалмайды. Анда джашагъан адамла, фатарларыны ичлерин тюрлендиребиз деб, къабыргъаларына тийгенлери, эсгермей хауаны сюрген кереклени джабханлары болса уа, газдан заран джетер деген къоркъуу болады.
Чарпыу неден боллугъун ачыкълар ючюн, джамагъатны газ бла баджаргъан къуллукъла баямлагъан информациягъа эс бёле турургъа керекди.
Ала билдиргенден, пропаны болгъан эски баллонла тыйышлы джерде сакъланмасала, палахны улусу аладан чыгъады. Ала уа, болуучусуча, хар юйде да бирер тыгъырыкъда турадыла. Тар джерчикде аладан чыгъа тургъан газгъа атылыргъа уа бир гитче джилтинчик да озуб джетеди.
Газ баллонну джылыдан сууукъ джерге чыгъарыб да кёбле терс иш этедиле. Температураны дженгил тюрленнгени газны атылтыргъа болады. Аны амалтын, газ кереклени джылыу берген системаны къатына салыргъа да джарамайды.
Газ керекле бир-бирлерине таб бегитилиб, тыйыншлысыча джарашдырылыб салынмагъанлары да чарпыулагъа келтирген чурумланы бириди.
Форсункалагъа суу тёгюлгени да къоркъуулуду. Суу отну джукълатады, газны уа тыймайды. Алай бла форсункадан кеси аллына чыгъыб баргъан газ эрлай огъуна атылыргъа джетеди.
Джылны сууукъ чакъларында кёб фатарлы юйледе джашагъан адамланы асламысы фатарларын джылытыр ючюн газ плитаны джандырадыла. Аны кечеге джандырыб къойгъанла да бардыла. Алай этерге чыртда джарамайды. Джандырылгъан плита кёз туурада турургъа керекди, алайсыз андан уллу къоркъуу барды.
Эски бош баллонну башха затха хайырландырабыз деб, аны ачыб-чачыб кюрешгенле да чыгъадыла. Бошха саналгъанлыкъгъа баллонну ичинде не аз да газы болмай къалмайды. Аны амалтын газ баллонну ачхан-чачхан, кесген бир да къоркъуулуду.
Газдан кишиге хыянат джетмесин дегенден, Эресейни МЧС-ни къуллукъчулары газ къуллукъланы келечилери бла бирге кёб фатарлы юйледе джашагъанланы, энчи юйлери болгъанланы араларында профилактика ишле бардыргъанлай турадыла. Ала газ кереклени хайырландырыуну джорукъларын адамлагъа эсгертедиле.
Газ атылгъандан сакъланыр ючюн бу затланы эсге алыгъыз:
1. Газ кереклени салыргъа, аланы ремонтларын этерге къуру да лицензиялары болгъан усталаны чакъырыгъыз;
2. Газ баллонланы, башха газ кереклени хайырландырыуну эмда асырауну джорукъларына сакъ болугъуз;
3. Тыйыншлысыча ишлеген газ приборла бла хайырланыгъыз;
4. Мекямны ичинде газ чыкъгъаны болса, терк огъуна аны хапарын газ къуллукъгъа билдиригиз;
5. Сабийлени газ бла ишлеген приборланы къатларына джууукъ иймегиз;
6. Газ бла ишлеген приборланы джандыргъан заманда алгъа сернекни джандырыб, артда газны ачаргъа кереклисин унутмагъыз;
7. Газ ийис ангылагъанлай газ трубаны джабыб, терезелени ачыб, эшикге чыгъаргъа ашыгъыгъыз.
От джукълатыучуланы неда къутхарыучуланы болушлукълары керек болса «101» неда «112» телефон номерле бла билдиригиз.

АДЖИКОВА Гульнара,
Эресейни МЧС-ни КъЧР-де Баш управлениесини ОАПиД-ни тамадасыны орунбасары.