Ата джуртну джигитлерини кюнюне аталыб, республиканы школларында патриот сезимлени ёсдюрюрге джораланнган дерсле, джыйылыула бардырыладыла.
Уллу джашау сынамлары болгъан адамла ёсюб келген тёлюлеге къралыбызны махтаулу тарихинден хапар айтадыла. Уллу Ата джурт къазауатны джылларында джигитлик, ётгюрлюк этген адамланы юлгюлеринде сохталада джууаблылыкъ, къралыбызгъа берилмеклик бла сюймеклик сезимлени къозгъайдыла.
Ата джуртну джигитлерини кюнюню аллы бла Къарачай-Черкес Республиканы ара шахарында орналгъан 6-чы номерли школда Халкъ фронтну джергили бёлюмюню башламчылыгъы бла Ата джуртха кертиликни дерси бардырылгъанды. Ары «Къарачай – алан халкъ» джамагъат бирлешликни тамадасыны биринчи орунбасары, милицияны отставкадагъы полковниги Боташланы Дауутну джашы Сулайман чакъырылгъан эди.
Джыйылыугъа школну 8-чи классыны сохталары келген эдиле. Халкъ фронтну Къарачай-Черкес бёлюмюню келечиси Тулпарланы Фатима сабийлеге Боташ улуну юсюнден талай сёз айтды.
- Бюгюн сизни аллыгъызда уллу иш эмда джашау сынамы болгъан, «Къарачай – алан халкъ» бирлешликни тамадасыны орунбасары, милицияны отставкадагъы полковниги Боташланы Сулайман сёлеширикди, - деди ол. – Боташ улу белгили джамагъат къуллукъчуду, республиканы ичинде бардырылгъан мероприятиелеге тири къошулгъан адамды. Джамагъат ишлени юсю бла Эресейни кёб джеринде да болгъанды. Аны кесини джашау джолу Эресей къралыбызгъа эмда Къарачай-Черкесиягъа халал къуллукъ этиуню юлгюсюдю.
Боташ улу кесини сёзюн бизни республиканы миллетлеринден башлады. Къарачай-Черкесияда 100-ге джууукъ миллетни келечиси шохлукъда, бир-бирин ангыламакълыкъда джашагъанларын чертди. Къралыбызгъа къыйын кёзюуледе ала, биригиб, келген джаугъа къаршчылыкъ таныта билгендиле. Ол затха шагъатлыкъды Уллу Ата джурт къазауатны кёзюуюнде онла бла адамланы къралны баш саугъаларына ие болгъанлары. Аланы ичлеринде тюрлю-тюрлю миллетлени келечилери бардыла.
- Къарачай-Черкесияны джамагъаты Ата джуртха кертилигин урушну джылларында кёргюзгенди – Черкесскеде Джигитлени аллеясына кирсенг, кёлюнг кёлтюрюледи. Къаллай бир джигит джашыбыз барды бизни! Ол зат ёсюб келген джаш тёлюле юлгю алырча уланларыбыз болгъанларына шагъатлыкъды, - деди Сулайман хаджи.
Андан ары сёзюнде Боташ улу Чочуланы Адамейни джашы Харун бла Голаланы Нанакны джашы Джанибекни Уллу Ата джурт къазауатда этген джигитликлеринден хапар айтды. Ала асыры таукел, ётгюр болгъандан атларын бизни республикадан тышында да бюгюн-бюгече да айтханлай турадыла. Харун, Европаны чегетлеринде партизан отрядха башчылыкъ этиб, джауну тынгысын бузуб тургъанды. Насыбы тутуб, урушдан сау-эсен къайтыб келгенди. Голаланы Джанибек лётчик болгъанды. Джуртуну азатлыгъын сакълай, джашлай джан бергенди. Экиси да «Совет Союзну Джигити» деген атха теджелгендиле. Ай медет, депортациягъа тюшген миллетни адамлары болгъанлары амалтын, алагъа эмда дагъыда кёб уланыбызгъа ол ат берилмей къалгъанды. 1990-чы джылланы ара сюреминде экисине да, дагъыда къарачай халкъны джети джашына, бютеулей да тогъуз адамгъа, «Эресейни Джигити» деген сыйлы ат берилгенди.
- Бюгюнлюкде, барыгъыз да билгенден, Украинада аскер къаугъа барады. Къарачай-Черкесиядан кёб адам, ол къаугъагъа кеси разылыгъы бла къошулуб, джигитликни юлгюсюн кёргюзеди. Медаллагъа, орденлеге ие болгъанланы саны кёбдю. Аскер кесаматлары тауусулгъан джашла, джаралы болуб госпиталлада джатыб чыкъсала да, юйлеринде къалыргъа унамай, джангыдан аскерге кетедиле. Мен айырыб бир адамны юсюнден айтыргъа излейме – ол Боташланы Хусейни джашы Къанаматды, - деди Сулайман. – Къанамат лётчик эди, генерал-майор эди. Пенсияда тургъанына да къарамай, Украинада аскер къаугъа башланнганлай, джангыдан самолётха олтурады. Салыннган борчну сый бла толтуруб келе тургъанлай, тенглерини къуршоугъа тюшгенин эшитеди. Ызына къайтыб, аланы да къутхарыб, кеси джан береди. Къанаматха «Эресейни Джигити» деген ат аталгъанды. Ол къуру Къарачай-Черкесияны махтауу тюлдю, аны бла бютеу Эресей къралыбыз ёхтемленеди.
Сулайман сохталагъа Эресейни кёб джеринде Боташланы Къанаматха эсгериу къангала, эсгертмеле салыннганларын черте, иги бла атын айтдыргъан адам кесини миллетине, джуртуна тюл, бютеу адам улугъа да сый, махтау келтиргенин айтды. Сабийлени ариу халили, адебли-намыслы болургъа чакъырды. Билим кючлю сауут болгъанын, аны бла къолланнган насыб болгъанын чертди, иги окъургъа кереклисин эсгертди.
Джыйылыуну аягъында Сулайман сохталаны сорууларына джууаб берди. Школну администрациясы эмда Халкъ фронтну келечилери анга, тюбешиуге келгени ючюн, разылыкъларын билдирдиле.
ТАРИЭЛЬ Дина.
