Къарачай-Черкесияны Башчысы Темрезланы Рашидни быйылгъы Чакъырыуунда элледе ишлеген врачлагъа къошакъ хакъ тёлерге дегенин КъЧР-ни Правительствосу да огъурагъанды.

Бу кюнледе КъЧР-ни Премьер-министри Мурат Аргуновну башчылыгъы бла республиканы Правительствосунда уллу джыйылыу болгъанды.
Анда 2022-чи джыл медицина къуллукъчуланы айлыкъларына регионал къошакъла этерге джораланнган проектни толтурургъа оноу этилгенди. Ол проект КъЧР-ни Башчысы Темрезланы Рашидни быйылгъы Чакъырыуунда айтылгъан излемлерини бири болуб джарашдырылгъанды.
Правительствону кенгешине къошулгъанла оноу этгеннге кёре, быйылдан башлаб джыл сайын «Земский доктор» деген программаны тамалында элде ишлерге баргъан врачлагъа федерал бюджетден бериллик ачхагъа регионал бюджетден да 100-шер минг сом къошуллукъду.
2022-чи джыл аллай кёлтюргючлюк бютеулей джамагъаты 50 минг адамгъа джетмеген эл къуралышлада ишлерге баргъан 21 врачха этилликди.
Аны бла бирге кенгешде башха ишлени оноулары да этилгенди.
Сёзден, министрле Къарачай-Черкесияны 100-джыллыгъына аталыб быйылны ахырына дери этиллик ишлени тизимине энтда талайны къошхандыла. Ала республиканы бютеу муниципал къуралышларында халкъ чыгъармачылыкъны «Мы вместе» деген фестивалларын, «Классика под звездами» деген Гала-концерт бардырыргъа, «Навеки с Россией» деген хакъла арасы фольклор фестиваль аны кибик башха джарыкълыкъ ишле къураргъа дегендиле.
Кенгешде «Положение о лицензировании предпринимательской деятельности по управлению многоквартирными домами и об осуществлении регионального государственного лицензионного контроля за осуществлением предпринимательской деятельности по управлению многоквартирными домами КЧР» деген документ хайырландырыргъа джараулугъа саналгъанды. Анда белгиленнген джорукъланы бузгъанланы айыбларына джолукъдурууну юсюнден да сёлешиннгенди.
Дагъыда КъЧР-ни Правительствосуну талай бегими тюрлендирилгенди. Алай бла «Развитие цифровой экономики Карачаево-Черкесской Республики», «Развитие строительства, архитектуры, градостроительства, жилищно-коммунального хозяйства и дорожного хозяйства в Карачаево-Черкесской Республике» деген кърал программаланы юслеринден бегимле бла «Борьба с сердечно-сосудистыми заболеваниями в Карачаево-Черкесской Республике на 2021-2024 годы» деген регионал программаны юсюнден бегим джангыртылгъандыла.