Элия (июль) айны 27-де КъЧР-ни Правительствосуну Председатели Мурат Аргуновну башчылыгъы бла джууукълашыб келген окъуу джылгъа хазырланыугъа аталгъан кенгеш бардырылгъанды. 

Анда КъЧР-ни къурулуш бла ЖКХ-ны хакъындан министри Семенланы Ренат Къарачай-Черкесияны шахарларында, эллеринде 18 орта школгъа деменгили ремонт этилиб бошала тургъаныны хапарын айтханды.
Ол айтхандан, билим берген учреждениелени джангыртыу «Модернизация системы школьного образования в КЧР» деген регионал проектни тамалында бардырылады. Ол проектге бютеулей да республиканы 23 школу тюшюрюлгенди.
КъЧР-ни Башчысы Темрезланы Рашидни излеми бла къурулушчула къадалыб, 18 школну окъуу джылгъа хазыр эте турадыла. Къалгъанлары да 2023-чю джылны ахыр сюремине хайырланыугъа берилликдиле.
Аны бла бирге орта билим берген учреждениелени хауа болумларын, суу бла баджаргъан системаларын, канализацияларын, арбазларын джарашдырыугъа аталгъан программаны тамалында дагъыда эки объектде ремонт ишле бардырыладыла: Псыж эл бла Исправная станседе орта школланы хар нелери да къыркъар (август) айдан къалса да къыркъаууз (сентябрь) айны 1-не таб джарашдырылыб бошаллыкъды.
Дагъыда Къарачай-Черкесияда 5 школ ишлене турады: Ючкекенде 960 орну болгъан, Адыге-Хаблде 600 орну болгъан, Хабезде 264 орну болгъан, Гюрюлдеуюкде 165 орну болгъан школланы къурулушлары тири бардырылады, Черкесск шахарда да 6-чы номерли орта школгъа 400 орну болгъан корпус ишлене турады.
Министр айтхандан, Гюрюлдеуюк элде джангы школну эшиклери къыркъаууз (сентябрь) айны 1-не ачыллыкъдыла.