Арттотур (апрель) айны 12-де Эресейни Почтасыны КъЧР-де управлениесини залында Къарачай-Черкес Республиканы 100-джыллыгъына аталыб чыгъарылгъан конвертлени кенг хайырландырыугъа иерча белги (гашение) салыугъа багъышланыб джыйылыу болгъанды.
Джыйылыугъа КъЧР-ни цифра ёсюмюню министрини борчларын толтургъан Валерий Медовый, КъЧР-ни Башчысыны кенгешчиси Ёзденланы Алибек, Эресейни Почтасыны КъЧР-де управлениесини тамадасы Лайпанланы Ахмат, КъЧР-ни Халкъ Джыйылыууну (Парламентини) депутатлары, Правительствону келечилери, почтаны къуллукъчулары къошулгъандыла.
Эресейни Почтасы белгили адамлагъа, эсгериу кюнлеге аталыб чыгъарылгъан почта конвертлени хайырландырыугъа иерча алагъа белги салыу ишни къурайды. Республиканы 100-джыллыгъына аталыб 50 минг экземпляр конверт чыгъарылгъанды.
Джыйылгъан джамагъатны аллында КъЧР-ни цифра ёсюмюню министрини борчларын толтургъан Валерий Медовый сёлешди.
- Къарачай-Черкесияны 100-джыллыкъ юбилейин белгилеуге аталыб кёб тюрлю иш этиледи. Бюгюннгю джыйылыуубуз да аланы бириди, - деди ол. – Къачан да почта къуллукъну баш борчу адамла бла ишлеу болгъанды. Бюгюнлюкде цифралы технологияла ёсюм алгъан заманда да почтаны магъаналылыгъы тюрленмегенлей келеди. Барыгъыз да билгенден, почта бёлюмледе кёб тюрлю джумушну баджарыр мадар барды. Эресейни Почтасыны «Шимал Кавказ» деген макрорегионуну тамадасы Максим Ткаченкогъа, почтаны джергили управлениесини тамадасы Лайпанланы Ахматха почта бёлюмлени джангыртыу бла байламлы проектлени толтуруб кюрешгенлери, почтаны иши джангы дараджагъа чыкъгъаны ючюн разылыгъымы билдиреме. Конвертлеге белгиле салыугъа аталгъан джыйылыуну магъанасы уллуду. Нек дегенде, республиканы 100-джыллыгъы кёб джылланы эсибизде къалыр деб къуралгъанды ол. Энтда бир кере сизни Къарачай-Черкесияны юбилейи бла алгъышлайма.
КъЧР-ни Халкъ Джыйылыууну (Парламентини) илмуну, билим бериуну, маданиятны, спортну, джаш тёлю ишлени эмда туризмни хакъындан комитетини председатели Алексей Ганшин айтхандан, талай джылла ётселе да, Къарачай-Черкесияны 100-джыллыгъына аталгъан коверт кёб заманны адамланы эслеринде сакъланныкъды. Ол депутатланы атындан почтаны къуллукъчуларына, ишлерин тыйыншлысыча баджаргъанлары ючюн, бюсюреу этгенди.
Сёз Эресейни Почтасыны КъЧР-де управлениесини тамадасы Лайпанланы Ахматха берилди.
- КъЧР-ни юбилейине аталгъан конвертлени чыгъарыргъа болушханлары ючюн республиканы башчылыгъына, Правительствосуна разылыгъымы билдиреме. Конвертледе республикагъа 100 джыл болгъаны, бизни тауларыбыз, КъЧР-ни картасы кёрюннген сурат салыннганды. Ол кёб заманны эсде турлукъду. Конвертле 50 минг экземпляр болуб чыкъгъандыла да, ала къралыбызны почта бёлюмлерине чачыллыкъдыла… - деб чертди Лайпан улу.
Конвертлеге биринчи белги салыргъа КъЧР-ни цифра ёсюмюню министрини борчларын толтургъан Валерий Медовый бла Эресейни Почтасыны КъЧР-де управлениесини тамадасы Лайпанланы Ахматха эркинлик берилди. Ахырында джыйылгъанлагъа ол конвертледен саугъа этдиле.
САЛПАГЪАРЛАНЫ Умар.
