Бир хан алай айтханды:

- Къолума суу къуя билген джашха къызымы берликме! Ханны ол айтханы тёрт дуниягъа джайылгъанды. Аны эшитген джашла къош-къош ханнга келиб башлагъандыла. Хан алагъа, «къолума суу къуй!» - деб, къумгъанны тутдуруб, ала да ханны къолуна суу къуюб онгдурмай, хан хар келген-келгенни, барын да бедишлик этиб къыстаб баргъанды. Энди не бу ханлыкъда, не хоншулада бир къолгъа суу къуя билген джаш джокъ эсе, бу не сейир дунияды деб, халкъ сейирге къалгъандыла. Ханнга кюёу табылырындан тюнгюле башлагъандыла.

         Бир кюн, бир къолайсызыракъ атха да миниб, юсю-башы да алай омакъ да тюл, бир джаш келгенди. Бир тюз сюрюучюню джашы.

  - Хан, эркинлик берсенг, мен суу къуяр эдим да сеннге бир къол джуудурур эдим!.. Аны эшитиб, халкъ кюлгендиле

- Эй, джаш, сен огъай, бери ханланы-бийлени джашлары да бурун уруб кёргендиле, иш тындыралмагъандыла ансы! Къой, бедишлик болма да кет да къал! – дегендиле.

- Къайгъырмаз...  Мен да адамла бла ёсгенме, ёмюрюмде атамы къолуна бир суу къуюб, къол джуудургъан тёрем болгъан болур!  - дегенди джаш.

- Нек кет да къал дейсиз? Джаш адамны бетин къакъмагъыз. Кёрсюн болумун! - дегенди хан. Джетдириб, джашны къолуна къумгъанны тутдургъандыла. Хан къол джууа, джаш да анга суу къуя башлагъандыла да, хан, къолларын таздан тайдырыб кетиб, бир джанында тутханды. Джаш а сууну тазгъа къуйгъанды да баргъанды, къумгъанны ханны къолларыны ызындан элтирге унамагъанды. Хан джашха джити-джити къарагъанды, болмагъанды, ханны къоллары бир джанында, къумгъандан суу къуюлгъан - тазгъа. Хан, чамланыб:

- Джаш, сууну къайры къуйгъанынгы кёрмеймисе?! - дегенди.

- Нек кёрмейме, кёреме, мен къуюллукъ джерине къуя турама! - дегенди джаш.

- Да сора, алай анда тёге турма да къолларыма къуй!

- Къолларынга къуярымы сюе эсенг, тутар джеринге тут! Мен къуяр джериме къуя турама! - дегенди биягъы джаш.

- Ыхы-ы, ол къадар келген къудурет адамны ичинде, сынгар сен билдинг айтырынгы да, этеринги да. Ансы, керт да ханды деб, мен къолуму къайры тутсам, ары къуюб, мен да таздан тышына тутуб, сууну джерге бардырыб тургъанбыз. Сен хорладынг. Сени бла сёлеширге, кенгеширге да боллукъду, мени кёлюмю алама деб, терсине тёнгерерик тюлсе! - дегенди хан.

          Алай бла, хан къызын ол джашха бериб, кюёу этгенди.                                                                                                                            Басмагъа хазырлагъан

                                                         СЫЛПАГЪАРЛАНЫ  Кулина.

                                                                   «Тюшюнюу» -1993.