Эресейни Президенти Владимир Путин къралны регионларына социал-экономика джаны бла болушлукъ этиуну юсюнден кенгеш бардыргъан кёзюуюнде регионал командаланы «Сильные идеи для нового времени» деген форумгъа къошулургъа чакъыргъанды.

Форумну Стратегия башламчылыкъланы агентствосу эмда «Росконгресс» деген фонд бардырадыла. Къралны Президенти айтхандан, эресейчиле ол форумну тамалында шахарланы, регионланы, къралны айнытыугъа джораланнган проектлени теджерге боллукъдула.

«Бизни экономиканы, къралны бюджетини, энчи табышлылыкъны узакъ болджаллы ишлени баджарырча мадарлары барды. 2030-чу джылгъа дери салыннган миллет стратегия кёргюзюмлеге джетерге керекбиз. Аны ючюн къарыуубузну-кючюбюзню аямай кюреширикбиз. Сёзсюз да, программаларыбызны джангыртыргъа, алимле, джамагъат бирлешликле, адамла теджеген затлагъа да эс бёлюрге керекбиз. Аны бла байламлы регионланы «Сильные идеи для нового времени» деген форумгъа къошулургъа чакъырама», - дегенди РФ-ны Президенти Владимир Путин.

022-чи джыл форумну бардырыргъа деб, Президент 2021-чи джыл эндреуюк (декабрь) айда Стратегия башламчылыкъланы агентствосуну советини кенгешинде теджеген эди.

Форумну къурау комитетине РФ-ны Президентини болушчусу Максим Орешкин башчылыкъ этеди. Аны къурамына Эресейни Президентини Администрациясыны, министерствола бла ведомстволаны келечилери, регионланы башчылары, табышлылыкъ бла кюрешгенле, ёсюм институтланы къуллукъчулары, эксперт, илму эмда медиа бирлешликлени келечилери киргендиле.

Форумгъа къошулургъа излегенле ideas.rosco-ngress.org деген платформагъа кеслерини проектлерин джиберирге керекдиле. Алагъа устала къараб, багъа берликдиле.

«Сильные идеи для нового времени» деген форумну ахыр этапы 2022-чи джыл джай кёзюуде ётерикди. Анда 2030-чу джылгъа дери салыннган миллет стратегия кёргюзюмлеге джетерге джораланнган 100 эм иги проект теджелликди.