Айбазланы Рамазанны къызы Борлакъланы Марина республиканы эл мюлк санагъатыны алчыларыны бириди. Ол джуртун, халкъын бек сюйген, башхалагъа игилик излеген, инджилгеннге къолундан келгенича болушхан ашхы адамды.

Атасы Айбазланы Магометни джашы Рамазан Къобан районда кесини мийик кёргюзюмлери бла атын дуниягъа айтдырыб тургъан, «Къобан» колхозну председатели болуб кёб джылланы ишлегенди. Аны туугъан джерине, джамагъатына, урунуугъа сюймеклиги уллу болгъанды. Рамазан тюрлениулени заманында колхозну чачыб къоймай, урунууну производствосун ёсдюрюб, атын махтау бла айтдыргъанды. Кърал аны къыйынына багъа бере, уллу кърал саугъала бла саугъалагъанды. Аланы арасында «Шохлукъну» ордени, «Хурмет Белгиси» орден, Эресей Федерацияны Эл мюлк министерствосуну алтын медалы эмда башха саугъалары бардыла.

Анасы Джашеланы Манафны къызы Фатима юй джумушха къараб, сабийлерине уллу эс бёле, аланы ариу халили, билимли этиб ёсдюрюрге джашауун атагъанды.

Марина 1977-чи джыл Дружба элде Рамазанны юйдегисинде туугъанды. Анда орта билим берген школну кюмюш медалгъа бошагъанды. Дерслерин айырмагъа этгенден сора да, ол джамагъат ишлеге къошула устазланы айтханларын этиб, юлгюлю халисин кёргюзгенди. Таулу къыз билимин андан ары ёсдюре, Шимал Кавказ кърал технология академиягъа кириб, аны джетишимли бошайды, анда «Бухгатерский учёт и аудит» деген кафедрада ишлерге къалады. Ассистент болуб студентле бла практика ишле бардырыб турады.  Марина 2018-чи джыл «Агроинженерия и технология сельскохозяйственного производства» деген кафедрагъа ишлерге киреди. Ол бюгюнлюкде да анда ишлейди, кафедраны доцентиди, экономика илмуланы кандидатыды.

Марина «Къобан» колхозгъа 2007-чи джыл экономист болуб ишге киреди. Ишин джиг-джигине дери билген, аны махтаулу баджаргъан къызны юч джылны мындан алда мюлкню башчысы къуллукъгъа саладыла. Къысха заманны ичине ол джерчиликде бюгюннгю излемлеге келишген инновациялы мадарланы уста хайырландыра, джангы джетишимлеге джетгенди. Колхозну ортакъгъа берилиб тургъан, пайщиклени юлюшлеринден къуралгъан 2065 гектар джери барды. Аны тышында къарачай тукъумлу къойла, атла, тууарла тутадыла. Ала кеслери излеген чакълы бир тюлдюле, малны санын ёсдюрюр муратлыдыла. Алай болур ючюн а, тозурагъан мал фермаланы, къошланы ремонт ишлери этилирге керекдиле. Малны узакъ иймей, аш бериб бир джерде тутадыла. Хант юй ишлейди, ишчиле хакъсыз ашайдыла. Мюлкчюле маллагъа къышха, джайгъа да ашны кеслери хазырлайдыла. Нартюхден, башха ёсюмлюкден силос къуйгъан чунгурлары хазырды. Чюгюндюрден патока, джом аладыла. Аланы да асырар джерлери барды. Тутхан малларын асламысына кеслери кереклилерине хайырландырадыла. Тышындан джукъ сатыб алмайдыла. Байрамлада кесиб ишчилерине юлешедиле, элчилеге чачадыла.   Малчыла ишлерин сюйген, тууарны, атны, къойну багъалатхан, тутхан ишлерин чийсил къоймай, бишириб этген адамладыла.

Мюлк бусагъатда асламысына джерчилик бла кюрешеди. Маринаны таб башчылыкъ этиуюнден мюлкню материал-техника базасы игиди. Комбайнала, тракторла, джюк ташыгъан машинала, битимни заманында тыйыншлысыча джыяргъа мадар бередиле. Мюлкчюле нартюх, будай, арпа, чюгюндюр, чёблеу, зынтхы, соя да себедиле.

Мюрзеу себген сагъатда хар не джанына да бек сакъ боладыла. Сёз ючюн, химия мадарла бла кюрешген усталаны билимлери игиди. Ала эринмей, арымай-талмай къолларындан келгенни этедиле. Джерге, табигъат болумгъа келишдириб, кереклисича бир ашау бериб, аны дамлылыгъына анализ этиб, къараб, хар ёсюмлюкге энчи схема къураб, иги битим алырча мадарла излеб кюрешедиле.  Кеслери сынагъан, билген джерлеге барыб, урлукъларын джангыртханлай турадыла. Элита урлукъну да селекция бла кюрешген алимледен сатыб аладыла.

Ишчилеге айлыкъ ишлегенлерине кёре бериледи. 

«Къобан» колхоз Шимал Кавказда, башха джерледе да кенг белгилиди. Анга не джаны бла да ышаныргъа боллукъду. Аны ючюн, бу мюлк бла иш джюрютгенле къайсы джанына да хайыр келтирлик ишле бардырадыла.

Мюлкчюле тюшген хайыргъа мюлкню техника базасын   джангыртадыла, урлукъ аладыла, джангы технологияланы хайырландырадыла, сууаблыкъ ишлеге да джоядыла.

Сёз ючюн, «Къобан» колхоз кёб джылланы узагъына Дружба элни спорт клубуна, школуна, сабий садына, ветеранларына, сакъатлагъа, инджилгенлеге болушханлай турады. Аны тышында элчилеге тауукъ аш,  шекер, джау, башха ашарыкъ продуктала бередиле.

Андан сора Маринаны буйругъу бла элде токну хайырланнганлары ючюн ачха тёлеялмай, къралгъа берликлери болгъанланы тизими джарашдырылгъанды. Ала пенсионерле, кёб сабийлери болгъан атала бла анала, алгъаракъда тюкенледе, кафеледе ишлеб бусагъатда ишсиз къалгъанла, пандемияны заманында хайыр эталмагъанла, башха инджилгенле болгъандыла.  Марина  аланы барысы ючюн да ачха тёлегенди. Мюлк кеси уа, «Золотая опора» деген конкурсну «Лучший потребитель электроэнергии среди предприятий селького хозяйства» деген номинациясында кёб кере хорлагъанды.

Марина аны тышында тилни, адабиятны, маданиятны хазнасын сакълай, аланы ёсюмлерине да энчи юлюш къошады.

Ол республикада бардырылгъан джамагъат ишлеге да тири къошулады. Республикада Тиширыуланы советини тамадасы болуб, Тиширыуланы къралла арасы ассоциациясыны къурамына киргенди. Шохлукъну, рахатлыкъны, мамырлыкъны кючюн джая, бу джаны бла хайыр келтирген кёб тюрлю иш бардырады.

Марина бла баш иеси Борлакъланы Мудалифни 4 джашлары барды. Рамин бла Руслан баш билим ала турадыла. Радмир бла Рамазан школгъа джюрюйдюле. Ата бла ана сабийлерин халкъны ашхы адетлерине, адебге, намысха, шохлукъгъа, патриотлукъгъа, ариулукъну сюерге юретедиле, ариу халили этиб ёсдюредиле. 

Мындан алда Борлакъланы Маринагъа «Къарачай-Черкес Республиканы эл мюлкюню махтаулу къуллукъчусу» деген сыйлы ат аталгъанды. Биз Маринаны ол мийик аты бла джылы алгъышлай, анга ишинде, джашауунда джангы джетишимле теджейбиз.

Халкъыбызны Маринача адамладан разылыкъ табхан халал, ачыкъ джюрекли, фахмулу, билимли, оюмлу, тири,  къайгъырыулу къызлары кёб болсунла.

Лепшокъланы Хусеин.