Донецк Халкъ Республика бла Луганск Халкъ Республиканы  джамагъатын 8 джылны азаб чекдириб джашатхандыла. Аны тышында Украинаны джеринде бизге къаршчы инфраструктура къурагъандыла. Ол зат бизни къоркъусузлугъубузну бузады.

Эресейни Президенти Владимир Путин адамлагъа джетген зарауатлыкъны, этиле тургъан артыкълыкъны рахатлыкъны тамалында кёб кере игилик бла, тыяргъа кюрешгенди. Миллетчиле аны айтханын ангыларгъа, этерге излемегендиле. Ол заманда Владимир Путин, ол республикаланы тамадаларыны тилеклерин къабыл этер ючюн, къралны башчылыгъы бла эмда депутатла бла кенгеш бардырыб, аланы разылыкълары бла нацистлеге, къаршчы спецоперация башларгъа деб, Указ чыгъаргъанды. Мени акъылым бла ол тюз этилген оноуду. Алай болмаса, 8 джылны узагъына тохтамай джаныб тургъан ёртен бизни чегибизден ётерге хазыр эди.

Аскерчилерибизни юслеринден айтсам, бизни джашла къайда да тириликлерин, онглулукъларын, Джуртха кертиликлерин кёргюзгенлей тургъандыла. Бу джол да уруннган миллетни артыкълыкъдан къутхара, аскер борчларын сый бла толтурлукъларына, джигитлик, эркишилик танытырыкъларына мен толу ышанама.

Къачхынчыла (беженцы) уруш болгъан джерде кёб боладыла. Аллайла болуб, бизни республикагъа келселе, бизникиле алагъа не джаны бла да болушурукъдула. Аш, суу берликдиле, саулукъларына къарарыкъдыла, сабийлери школгъа, сабий садлагъа барырча мадарла къурарыкъдыла.

Къарачайлыла, бизни республиканы миллетлери аллай затны юсюнде кеслерин юлгюлю кёргюзюб тургъандыла, бусагъатда да къарыуларын, кючлерин аярыкъ тюлдюле.

Доюнланы Абдурахман,

Къарачай-Черкесияны махтаулу устазы.