Бу кюнледе «Хорламны джырлары» деген музыкалы проектни тамалында Къарачай-Черкесиягъа келген «Хор Турецкого» деген вокал коллективни артистлери, Черкесскеде Хорламны паркында Къарнаш къабырланы «Огонь Вечной Славы» деген мемориалына гокка хансла салдыла. Ала Хорламны 75 джыллыгъына атаб концерт да кёргюздюле. Ол ишге къошулгъанланы арасында Къарачай-Черкес Республиканы Башчысы Темрезланы Рашид, КъЧР-ни Правительствосуну Председателини орунбасары Чеккуланы Хызыр, Черкесск шахарны мэри Руслан Тамбиев, Къарачай-Черкесияны маданият министри Рамазан Бороков, Уллу Ата джурт къазауатны ветеранлары, тылда уруннганла, сабий патриот бирлешликле бар эдиле.
«Сиз, «Хорламны джырлары» деген проектигиз бла Къарачай-Черкесияны джеринде болгъаныгъызгъа мен къууанама. Бизни Президентибиз, миллет башчыбыз Владимир Владимирович Путин 2020-чы джылны Эсгериу бла махтауну джылы, деб баямлагъанды. Сиз бюгюн тёрт тёлюню байламлылыгъын кёресиз. Мен бизни аламат, ариу, фахмулу сабийлерибизге къууаныб къарайма, бу ишге бизни уллу тёлюбюз да къошулгъанды. Быллай кёзюуледе патриотизмни дерслерин алгъаныбызгъа мен ишексизме», - деди Темрезланы Рашид.
Регионну Башчысы республикабызны, къралыбызны адамларына игилик, рахатлыкъ теджеб, республиканы джамагъатыны атындан «Хор Турецкого» деген коллективге разылыгъын билдирди.
Андан сора КъЧР-ни Башчысы Темрезланы Рашидни башламчылыгъы бла сабийле джырлагъан республикан хор къуралгъанды. Ала ол кюн биринчи кере «Хор Турецкого» бла бирге джыйылгъанлагъа концерт кёргюздюле.
«Мен аскерчини джашыма. Атам «Ленинград къуршоуну» чачаргъа къошулгъанды. Мен Хорлам бизге къалай джетгенин ол айтхандан билеме. Ол къазауатда Совет Союздан кёб адам ёлгенди. Быллай джерлеге келиб къарасакъ, биз Хорламны багъасын сезебиз. Мен ол кёзюуде уллу кёб миллетли совет халкъны этген джигитлигине юлюш къошханча болама.
Къарачай-Черкес Республиканы джеринде биз бюгюн Къарнаш къабырланы юсюне гокка хансла салгъаныбызгъа, тариххе киргенибизге бек къууанабыз», - деди артистлени продюссери Михаил Турецкий.
Эсигизге салайыкъ, «Хорламны джыры» деген Бютеуэресей тур бла байламлы къралыбызны 75 джеринде иш бардырыллыкъды.
Проект тёлюле бла заманны арасында байламлылыкъ тутаргъа, ата-бабаланы этген джигитликлерин унутмазгъа деб къуралгъанды. Репертуар программада джашауну, шохлукъну, рахатлыкъны, джигитликни, сюймекликни юслеринден адамны джюрек сезимлерин къозгъагъан джырла бардыла. Бу джырла къуру тёлюлени байламлы этиб къоймайын, джерни юсюнде болгъан адамланы да бирикдиредиле. Тынчлыкъ, рахатлыкъ, бирикмеклик игиликни мийик шартларыдыла.
Быллай сейир ишни бардырыргъа деген башламчылыкъны Къарачай-Черкесияны Башчысы Темрезланы Рашид, республиканы Правительствосу джакълагъандыла.
Аны шахарны, регионну джашауунда уллу магъанасы барды.
Ол уллу къууанч ишни кёзюуюнде, артистле Шимал Кавказны тарихини юсюнден Москвада Хорламны Ара музейинде сакъланнган документлени алыб келиб бергендиле.
Узеирланы Хусей.
{jcomments}
