Адамны тас этген саулугъун орнуна салыуда медицинада хирургла баш орунну бирин аладыла.

Ала тюрлю-тюрлю ауруулагъа къарайдыла, дарман-дары бла багъадыла, операция этедиле, кече-кюн айырмай, заманларын къызгъанмай кюрешедиле. Мен хапарын айтыргъа излеген Борлакъланы Манафны джашы Мурат аллай докторланы бириди. Ол, баш категориялы врач, джюрек тамырлагъа къарагъан хирургду, флебологду, УЗИ-ни врачыды. Ол бусагъатда адамлагъа уллу заран салгъан варикоз ауруу бла кюрешеди.

Мурат 1981-чи джыл Сары-Тюзде Манафны огъурлу юйдегисинде туугъанды. Былайда орта школну айырмагъа бошагъандан сора, 1998-чи джыл Челябинск шахаргъа барыб, Эресейни кърал медицина академиясына кириб, аны джетишимли окъуб бошаб, «джюрек тамырлагъа къарагъан хирург» деген усталыкъ алгъанды. Ол «Ультразвуковая диагностиканы» да врачыды. Таулу джаш билимин андан ары ёсдюре, аны аспирантурасын да тауусханды. Челябинск область больницада джюрек тамырлагъа къарагъан хирург болуб 2010-чу джылгъа дери ишлегенди. Анда уллу сынамлары болгъан белгили хирургладан юрене, фахмусун, билимин ёсдюре, атын сый бла айтдырыб ишлегенди.

Къарачай-Черкесияда Къан тамырлагъа къарагъан регионал аралыкъ ачылгъанды, ары врачла керекдиле, деб эшитгенинде, туугъан джуртуна ишлерге келеди. Андан бери былайда урунады. Ол бусагъатда республикан больницада варикоз ауруудан бакъгъан, операция этген врачды.

- Адамны организминде, бойнундан башлаб, аягъына дери къан тамырладыла. Аланы барына да операция этерге болады. Къан тамырланы къабыргъалары джыйырылыб, ичлери толуб, ала бла къан джюрюмей тебресе, анга варикоз ауруу дейдиле. Ол къан бла да келеди, джашаууну асламысын олтуруб ашыргъанлада, ауур адамлада, къыйын ишледе уруннганлада да болады. Республикада, бютеу къралда кёб тюбеген, адамгъа уллу джарсыу келтирген аман аурууду.

Аллай ауруу былай болгъанлай, адамла, созуб турмай, хирурглагъа терк келселе, аны къурутхан тынчды. Джангы заманында дарман-дары бла сау этерге болады. Озуб, тереннге сингсе, адамны онгун алгъан ол аурууну къурутхан операцияды. Бусагъатда илму ёсгенден ёсюб баргъаны себебли, заманны излемине кёре, джангы технологияла чыгъадыла. Аны ючюн къан тамырлагъа операция этен къыйын тюлдю. Бир къауумла уа аны бек къыйыннга санаб, чурумла къураб, заманында келирге излемейдиле. Ала бек терс иш этедиле. Не тюрлю къан тамыргъа да аны кесиб операция этиледи. Кесмегенлей этерге да болады. Къан тамырны ичи лазер бла да джарашдырылады, - дейди ол.

Муратны аллына баргъанлагъа ол, джылы кёзден къарай, не этерге кереклисин айтыб ангылатады. Аны бла тохтаб къалыргъа болмайды. Ол, ауруу кючюне кириб тургъанын кёрсе, операция этеди.

Борлакъ улу айтхандан, адамла бирча тюлдюле. Хар адамны саулугъуна, психологиясына кёре ауругъан разы болурча болум къураб ишлейди. Ол операция этген адамладан аманнга кетген, саулугъуна тарыкъгъан болмагъанды. Мурат, джаш болса да,  фахмусу, билими, сынамы да уллуду, сюйген ишине толу берилиб урунады.

Аны врач болуруна себеб болгъан атасы бла эки къарнашдан туугъан, область больницада 20 джылдан аслам ишлеген белгили хирург Борлакъланы Маджитни джашы Ахмат болгъанды. Мурат, андан юлгю ала, гитчелигинден Ахматха ушаргъа кюрешиб, бусагъатдагъы усталыгъын алай сайлагъанды.

Атасы Борлакъланы Махаметни джашы Манаф 18 джылындан Къумушда «Сельхозтехникада» джюк ташыгъан тюрлю-тюрлю машиналада 25 джыл ишлегенди. Анасы  Элкъанланы Топашны къызы Лиза кооперацияда уруннганды. Бусагъатда тыйыншлы солуудады.

Мурат Магъаяланы Анзорну къызы Лейла бла юч сабий ёсдюреди. Алина, Ахмат, Умар алкъын школгъа бармайдыла. Юй бийчесини баш билими барды. Сары-Тюз орта школда устаз болуб ишлей, кёб джаш адамны джашау джолну айланч-буйланчында абынмай барырча юретгенди. Бюгюнлюкде гитче сабийлеге къарайды.

Борлакъланы Мурат бусагъатдагъы къуллугъунда ишлеген сегиз джылны ичинде кёб адамны саулугъун къайтарыб, сый, разылыкъ табханды. Ол сюйген ишине мындан ары да кючюн-къарыуун аямай берир муратлыды.

Лепшокъланы Хусеин.