Къарачай-Черкесия табигъатыны ариулугъу, магъадан байлыгъы, джаныуарлары, къанатлылары, дарман ханслары бла айтылыб къалмай, фахмулу, билимли адамлары бла да кёб джерледе белгилиди. Аллай атын айтдыргъан джашланы бириди Шаманланы Айдар да.

Джаш болса да фахмулу, болумлу, керек джерде кимге да джараргъа излеген адамды. Сабийлигинде сахнада тепсегенлеге сукълана туруб, аякъ юсюне миннгенден сора «Эльбрус» кърал ансамблге ишге джарашады. Коллектив бла бирге Россияда, тыш къраллада да гастроллада айланыб, уста тепсегени бла кёблени сейирсиндириб турады. Аны тышында да джаш тёлюню маданиятыбызгъа кёллендире, тау тепсеулеге юретгенин къурутмайды. Къарыулу, кючлю джашды, аны бла бирге таукеллиги бла да махтаугъа, сыйгъа тыйыншлы болуб келеди. Сёз ючюн, былтыр тенгизде джууунуб чыгъыб, джагъада къумгъа джатханлай, болушлукъ излеб къычыргъан таууш къулагъына келеди.

Бир тиширыу бла сабий суугъа бата да, чыгъа тургъанларын, алайда кеслерин кюннге къыздыргъанла бары да кёредиле. Алай а Шаман улуча тири чыкъмайды. Суугъа секириб, къатларына джетеди. Экисин да джагъагъа чыгъарады. Шаман улу аны джигитликге санамаса да, алайдагъыланы бары да джашха уллу бюсюреу, алгъыш этедиле. Анга дери да мынга ушаш затлада Айдар адамлагъа болуша тургъанды.

Ким да келир заманнга ашхы муратла этеди, джаш адамла уа артыкъ да бек. Айдарны да бардыла муратлары. Ол башха тепсеучю бёлекледен да иги ансамбль къураргъа эмда кинофильмледе ойнаргъа излейди. Аллах айтса, фахмулу джашны ол муратлары да толурла.

(БИЗНИ КОРР.).