Ата джуртну кёб тюрлю къорууларгъа боллукъду: кюн сайын тюрлю-тюрлю производстволада ишлеб, спортда джетишимле этиб, урушха къошулуб… Украинада спецоперация башланнганлы эки джыл ётгенди.

Ол заманны ичинде джигитлик танытыб, аскер борчларын бет джарыкълы баджаргъан аскерчилерибизни юслеринден газетибизни бетлеринде джазар ючюн къалмагъанбыз. Бюгюн да аллай джигит джашланы бири, спецоперациягъа биринчи кюнлериден огъуна къошулгъан Мамаланы Рустамны джашы Азаматны юсюнден хапар айтыргъа излейбиз.
2021-чи джыл Азаматны тренери ол юретген спортчу джашла миксфайтдан дунияны кубогунда алтын медалны алгъанларыны юсюнден къууаныб хапар айтхан эди. Ол эришиуледе Азамат 93 килограмм ауурлукъда кесин сынагъанды. Ол заманда анга 23 джыл болгъан эди. Талай айдан Мамаланы Азамат кесамат этиб, кеси разылыгъы бла спецоперация баргъан джерге атланырыкъды деб ол кёзюуде эсибизге келлик да болмаз эди.
Азамат Къарачай шахарда туугъанды. Бёлек замандан Мамалары Черкесск шахаргъа кёчедиле. Азамат анда 17-чи номерли гимназияны тауусханды. Эркин тутуш бла сабийлигинден кюрешиб тебрегенди. Биринчи хорламына 9-чу классда окъугъан заманында ие болгъанды. Школну тауусханындан сора, Шимал Кавказ федерал университетге кириб, финанс къоркъуусузлукъ бла байламлы усталыкъ алгъанды. Алай болса да, спортну къоймагъанды.
Джаш адам сабийлигинден патриот сезимледе ёсгенди. Ата джуртума джарайым деб, кесаматны тамалында аскер къуллукъну сайлагъанды. Аскер къуллукъда да Азамат спорт бла кюрешгенин къоймагъанды, аскер бёлегини атындан тюрлю-тюрлю эришиулеге къошулгъанды, аланы биринден да хорламсыз къайтмагъанды. Миксфайтдан дунияны чемпиону, ММА-дан спортну устасы, эркин тутушдан спортну устасына кандидат Мамаланы Азамат сабийлени юретиб да тургъанды.
2022-чи джылны ал сюреминде, спецоперация башланнган кёзюуде, Азамат кесаматха къол салыб, СВО баргъан джерге джол тутады. Ол анда бюгюн да къуллугъун бардырады. 2023-чю джыл, джигитлик танытханы ючюн, Суворовну медалы бла саугъаланнганды.
Санында инджитгени да бола тургъанлай, Азамат уллу спорт эришиулени биринде тутушуб, хорламгъа ие болгъан эди. Бусагъатда да, аскер къуллукъ этген эки джылыны ичинде, сайлагъан джолуна бир кере да сокъуранмагъанды. Хорлам бизники боллугъуна ол бек ийнанады, нек дегенде, бизни баш муратыбыз адамланы эркинликлерин джакълауду, нацизмни къурутууду. Биз да Азамат, башха аскерчиле да юйлерине сау-эсен, хорлам бла къайтырыкъларына ышанабыз. Ата джуртубуз сизни бла ёхтемленеди!

ХУБИЙЛАНЫ Фатима.