Европаны регионал эмда джергили властларыны конгресси Европаны Советини къурамына кирген политика ассамблеяды. Ол тюрлю-тюрлю къраллада регионал эмда джергили органланы бирикдиреди. Конгрессни баш борчу джергили эмда регионал демократияны джайыуду, кеслери кеслерине оноу этген джергили эмда регионал органланы Европада белгиленнген джорукълагъа кёре бегитиудю.
Дунияда 200 мингден артыкъ джергили эмда регионал орган ишлейди. Ала 47 къралда орналгъандыла. Конгрессни 324 члени бла алагъа заместителле болуб тургъан 324 адамы барды. Эресей Федерацияны Президенти В. Путин Темрезланы Рашидни ол Конгрессге бизни къралдан баргъан делегацияны члени этиб джибергенди.
Страсбургда Темрезланы Рашид бла Иванов Александр Конгрессни алгъыннгы Председатели, бусагъатда Австрияны Тироль деген федерал джерини Парламентини Председатели Хервиг ванн Стаа бла тюбешгенди.
Ала эки арада баргъан ушакъны кёзюуюнде Конгрессни ишин этимли этиуню, Къарачай-Черкесия бла Австрияны Тироль деген федерал джери бла иш джюрютюуле бардырыуну юслеринден бусагъатха дери этилген оноуланы къалай тола баргъанларыны, туризмде, промышленностда, эл мюлкде, маданиятда хайырлы байламлылыкъланы андан ары кенгертиуню хакъындан сёлешгендиле. Тыйыншлы оноула да этгендиле.
