Къарачай-Черкес Республиканы Чегет управлениесинде Чегет мюлкню федерал агентствосу план бла белгиленнген тинтиу ишле бардыргъанды. Комиссия Чегет управлениени мюлклерини джерлерини чеклерине, ала бир-бирлери бла къалай байламлылыкъ тутханларына, чегет мюлкледе иш къалай къуралгъанына, башха затлагъа къарагъанды. Чегет мюлклени федерал агентствосу эркинлик берген Чегет надзор бла контролдан управлениесини тамадасыны орунбасары Александр Шишов башчылыкъ этген комиссия, Къыбыла федерал округну чегет мюлклерини департаментини къуллукъчулары, «Рослесресурс» ФГКУ-ну, «Рослесинфорг» ФГБУ-ну, «Рослесозащита» ФБУ-ну келечилери да къошулуб, быйыл мартны 12-ден 30-на дери тинтиу ишле баргъандыла. Комиссияны членлери, республиканы районларында орналгъан чегет мюлклени барына да айланыб, иш къалай къуралгъанына къарагъандыла. Бу санагъатдан терен хапарлары болгъан адамла, эринмей, хар затны джик-джигине дери тинтгендиле. Алай болса да ала тинтиулени кёзюуюнде адам айтырча кемликле табмагъандыла. Хар мюлкде документация джарашыб, болгъан техника таб хайырландырылгъаны, ишлерин сюйген сынамлы чегетчиле, кече-кюн демей, ишлерин тыйыншлысыча бардырыб кюрешгенлери ачыкъланыб, комиссияны членлери алагъа разылыкъларын билдиргендиле.
Тинтиу ишле бошалгъанларындан сора, аны ахыр эсеблерин чыгъара, Къарачай-Черкес Республиканы Правительствосуну Председателини биринчи орунбасары Байчораланы Эльдар, Къыбыла федерал округну Чегет мюлклерини департаментини тамадасы Пётр Костенич, Чегет мюлклени федерал агентствосу эркинлик берген Чегет надзор бла контролдан управлениесини тамадасыны орунбасары Александр Шишов, Къарачай-Черкесияны Чегет мюлклерини тамадасы Батчаланы Борис, тюбешиб, мындан ары кёзюуде этиллик ишлени юслеринден сёлешгендиле.
Ишчи тюбешиуню кёзюуюнде талай ишге къаралгъанды. Автоном учреждениеле заманында, толусу бла от тюшмезча, тюшгени болса, аны терк джукълатырча ишле къалай бардыргъанларыны, «Лесная пожарная охрана» деген учреждениени керекли затла бла толу баджарыуну юслеринден ишлеге къаралгъанды.
Россия Федерацияны Президенти Владимир Путинни указы бла 2018-чи джыл Волонтёрланы джылы этилиб баямланнганды. Аны бла байламлы управление чегетлени, чегетлеге джууукъ джерлени отдан сакъларгъа джамагъатдан чегет инспекторла къурар муратлыды.
Аны тышында чегетчиликни аякъ юсюне сала, быйыл Ермоловкада чегетчиликни Чегет фондуну 5 гектар джеринде агъачлы терекледен чегет питомник къураргъа деген оноу этилгенди. Алайда хаман да джангы терекле орнатылгъанлай турлукъдула. Ол Уруп чегет мюлкню джерине киреди.
Уруп чегет мюлкню базасында агъачдан тюрлю-тюрлю затла этген производствону модернизациясына да джюрюш берирге деген оноу этилгенди. Ол заманда чегет мюлк хазырлагъан хайырлы агъачдан кёб тюрлю зат этилликди. Адамла шифоньерле, тумбала, столла дегенча юй турмушда хайырландырылгъан затларын алайдан табыб алыргъа боллукъдула. Джангы иш орунла да къураллыкъдыла.
ЛЕПШОКЪЛАНЫ Хусеин.
{jcomments}
