Бу кюнледе Росгвардияны Къарачай-Черкесияда бёлюмюню терк джетиучю спецотряды (СОБР) кесини 25-джыллыгъын белгилегенди.
Къууанч джыйылыугъа РФ-ны Миллет гвардиясыны Шимал Кавказ округну аскер бёлегини тамадасыны заместители, полковник Михаил Романов, КъЧР-де бёлекни тамадасы, полковник Салпагъарланы Рашид, республиканы прокуроруну заместители, юстицияны полковниги Гербекланы Алий, СОБР-ну ветеранлары, республикада излеу-къутхарыу отрядны тамадасы Андрей Мозгов къошулгъандыла.
- Сиз,  къралны къалайында да къыйын аскер борчугъузну махтау бла толтура барлыгъыгъызгъа ишексизме, - дегенди, джыйылгъанланы алларында сёлеше, Михаил Романов.

Ол кюн СОБР-да къуллукъ этген адамланы талайына кърал саугъала берилгендиле. Ала бла бирге башында сагъынылгъан Михаил Романов бла Салпагъарланы Рашидни да, бу ишге юлюш къошханлары ючюн, атларын айтхандыла.
СОБР отряд къуралгъанлы бу джолгъа дери да эм тыйыншлылагъа кърал саугъала берилгенлей тургъандыла. Сёз ючюн, 19 адамгъа «Ётгюрлюгю ючюн» орден, 10 адамгъа «Джигитлиги ючюн» медаль, 15 адамгъа «Ата джуртну аллында джетишимлери ючюн» орденни медалы, 23 къуллукъчугъа «Джамагъат джорукъну сакълауда айырмалыгъы ючюн» медаль, бир адамгъа «Ата джуртну аллында джетишимлери ючюн» къылыч суратлары болгъан орденни медалы, биреуленнге да «Чарпый тебрегенлени къутхаргъаны ючюн» медаль берилгенди.
Къууанч джыйылыуну ахырында бары да бирден аскер борчун толтура ёлген нёгерлерин эсгергендиле. Джыйылыуну юбилейге аталгъан спорт программа бла тамамлагъандыла.

(БИЗНИ КОРР.).