Бу кюнледе Москвада КъЧР-ни Башчысы Темрезланы Рашид РФ-ны Федерал Джыйылыууну Федерация Советини Председатели Валентина Матвиенко бла тюбешиб, Рашид 2023-чю джыл республиканы социал-экономика ёсюмюню эсеблери эмда быйыл этиллик ишле бла шагъырей этгенди.

Тюбешиуде элчилени джашау дараджаларын ёсдюрюуге уллу эс бёлюннгенди. Валентина Матвиенко республикада эллени айнытыу бла байламлы программа джетишимли толтурулгъанын чертгенди.
«Арт джыллада Къарачай-Черкесияда кёб школ ишленнгенди, ремонт этилгенди. Бюгюнлюкде сабийлени солутуу, саулукъларын сакълау инфраструктураны джангыртыуну хакъындан программаны толтуруб тебрерикбиз. Регионну мадарларын хайырландырыб, элледе ишлерча кадрланы табыб, алагъа болушлукъ этиуге да эс бёлюрге тыйыншлыды», - дегенди Валентина Матвиенко.
Республиканы Башчысы Темрезланы Рашид айтхандан, Эресейни Президентини башламчылыгъы бла къуралгъан миллет проектле бла кърал программаланы толтурууну себебинден республикада элледен кёчюб баргъанланы саны азайгъанды. Элледе джангы сабий садла, фельдшер-акушер пунктла, физкультура-саулукъ сакълау комплексле, джарыкълыкъ юйле ишленедиле.
Темрезланы Рашид, Черкесскеде драмтеатрны мекямын джангыртыу бла байламлы проектни джакълагъаны ючюн, Федерация Советге разылыгъын билдиргенди. Быйыл ремонт ишле башланныкъдыла, проект кърал экспертизаны ётгенди. Бюджетде анга ачха да бёлюннгенди.
Валентина Матвиенко адамлагъа, республиканы экономика ёсюмюча, маданият учреждениелени да магъанасы уллу болгъанын чертгенди.