Сабий садха къараргъа КъЧР-ни Башчысы Темрезланы Рашид бла бирге КъЧР-ни Халкъ Джыйылыууну Парламентини Председатели Александр Иванов, КъЧР-ни къурулуш эмда мекям-коммунал мюлкюню министри Евгений Гордиенко эмда Зеленчук районну администрациясыны башчысы Сергей Самоходкин баргъан эдиле.
Башында айтылгъаныча, джангы ишленнген сабий сад бюгюннгю заманны излемине келишген сабий садды: аны ичинде сабийле ойнай турурча залла, джукъларча кенг бёлмеле, хант юй, медицина кабинет бардыла. Андан сора къонакъла сабий садны акт эмда спорт залларына къараб чыкъдыла.
Джангы ишленнген эки этажлы сабий сад кесини эшиклерин джангы окъуу джыл башланыргъа бир-эки ыйыкъ къалыб ачхан эди. 1 джыл бла 5 ай эмда тюгел 7 джыл толмагъан сабийле джюрюрюкдюле. Бютеулей да 12 къауум боллукъду да, бары да къуралгъандыла. Алгъын джыллада Зеленчук районда сабий садла азлыкъ этгенлери себебли 3 джылдан 7 джылгъа дериги сабийле кеслерини кёзюулерин сакълаб, кёб заманны туруучан эдиле. Энди джангы сабий сад ишленнгенинде, ала анга барыб башлагъандыла.
Юч джыл толмагъан сабийлени аналарына да бек къыйын эди сабийлерин берир джер болмагъаны себебли. Джангы ишленнген «Золотой ключик» деген сабий садны ичинде эм гитчелеге деб юч ясли ачылгъанды. Алагъа да 45 сабий джюрюрюкдю. Джангы ишленнген сабий садны штаты толусу бла баджарылгъанды. Алай бла 70 адамгъа анда иш орун ачылгъанды. Аланы арасында 20-сы воспитателледиле.
КъЧР-ни Башчысы Темрезланы Рашид сабий садны арбазына да къараб чыкъды. Аны арбазында 12 сабий площадка барды да, бары да заманны излемине кёре ишленнгендиле. Сабийле физкультура бла кюреше турурча спорт площадка да барды арбазда. Андан сора да арбазда сабийле джолда тюз джюрюуню джорукъларын билирча джер да ишленнгенди.
КъЧР-ни Башчысы джангы сабий садха къараб бошагъандан сора, аны хар неси да 100 процентге хазыр болгъанды, къысха заманны ичинде хайырланыугъа берирге кереклисин чертди.
Бусагъатда Морх элде да джангы сабий сад ишлене турады. КъЧР-ни Башчысы Темрезланы Рашид республиканы къурулуш эмда мекям-коммунал мюлкюню министри Евгений Гордиенкодан мекямны къурулушуна эс бёлюрюн изледи эмда келир джыл аны хайырланыугъа берирге кереклисин эсге салды.
(БИЗНИ КОРР.).
