Эндреуюк (декабрь) айны 7-де Бештау шахарны «Моя страна. Моя история» деген музей-кёрмюч аралыгъында РФ-ны Президентини Шимал Кавказ федерал округда Толу эркинликли келечиси Юрий Чайка #МЫВМЕСТЕ чакъырыу бла къуралгъан штабланы гуманитар болушлукъ джыйгъанларыны презентациясына къарагъанды.
#МЫВМЕСТЕ чакъырыу бла ШКФО-да къуралгъан штабланы келечилери бла тюбешиуню ача, Юрий Чайка: «Пандемияны кёзюуюнде коронавирусха къаршчы кюрешни бардырыр ючюн, биригирге керек болуб, къуралгъан эдиле бу штабла. Бютеу джамагъатха къатылгъан ауруу сорушханында да волонтёрланы болушлукълары къыйын болумда джашагъанлагъа, ауругъанлагъа, къартлагъа джараб тургъаны амалтын, штабла бюгюнлюкде да ишлеб турадыла», - дегенди.
«РФ-ны Президенти Владимир Путин спецоперацияны бардырыргъа дегенинде, алагъа джангы джумушла да табылдыла. Бусагъатда #МЫВМЕСТЕ чакъырыу бла къуралгъан штабла аскерчилерибизге, аланы юйдегилерине гуманитар, педагогика, психология, юрист болушлукъ этедиле.
Къыйын болумда къралыбызны политикасын толтуруугъа Шимал Кавказ федерал округда 3000 волонтёр кеси разылыгъы бла къошулгъанды. Бу кёргюзюм Шимал Кавказда тамам къайгъырыулу адамла джашагъанларын, ала бир-бирлерине билек болургъа хазыр тургъанларын кёргюзеди», - деб да къошханды Юрий Чайка.
Презиндентни ШКФО-да Толу эркинликли келечиси волонтёрлагъа, Бютеуэресей халкъ фронтну келечилерине, #МЫВМЕСТЕ деген акцияны тири бардыргъанлары ючюн, уллу бюсюреу этгенди.
Тюбешиуде хар регионал штабны иши сюзюлгенди, эсебле чыгъарылгъандыла. Алчы командаланы саугъалау да анда болгъанды.
Регионал штабланы келечилерине РФ-ны Президентини Шимал Кавказ федерал округда Толу эркинликли келечиси Юрий Чайка «За бескорыстный вклад в организацию работы по сбору гуманитарной помощи» деген Разылыкъ къагъытла бергенди.
Алайда Президентни ШКФО-да Толу эркинликли келечиси бла бирге сохталагъа джораланнган «СтартМашук» деген билим бериу платформа да къууанч халда хайырландырылыб башланнганды.
Джангы билим бериу платформаны ачылгъанына аталгъан къууанчха ШКФО-ну регионларындан айырмагъа окъугъан 300 сохта къошулгъанды. Аланы араларында РФ-ны джангы субъектлерини келечилери да болгъандыла.
Юрий Чайка округну сохталарына джараулу иш этилгени бла джыйылгъанланы барын да джылы алгъышлагъанды.
«Джангы платформа ШКФО-ну субъектлеринден конкурслада ёчлю орунланы алгъанланы да, лауреатланы да бирикдирликди. Аны бла джангы регионладан сохтала да хайырланныкъдыла. Аны себебинден, ала эресейчи билим бериу мардалагъа дженгил келиширикдиле.
«СтартМашук» деген платформа фахмулу сабийлеге не джаны бла да ёсюм алыргъа джол ачарыкъды, аланы патриот ангыларын бегитирге да иги джарарыкъды», - дегенди Президентни ШКФО-да Толу эркинликли келечиси.
Ол айтхандан, бу платформа бла хайырланнганла джыл сайын бардырылгъан форумлагъа, Эресейни джигитлери бла, белгили алимле эмда джамагъат келечиле бла тюбешиулеге да къошула турлукъдула.
«Аллыгъызда джарыкъ, узакъ джолугъуз барды. Сиз ол джолну шох, джуртубузгъа ёсюм алдырыргъа джарарыкъ джангы проектле къурай, аланы толтурургъа бир-биригизге болуша барлыгъыгъызгъа ишек этмейме», - дегенди Юрий Чайка.
Президентни ШКФО-да Толу эркинликли келечиси #МЫВМЕСТЕ чакъырыу бла къуралгъан волонтёр штабланы сууаблыкъ ишлери сабийлеге ашхы юлгю болгъанын да чертгенди.
