«Бирикген Эресей» политика партияны федерал дараджада башчылыгъындан, РФ-ны сенатору Салпагъарланы Ахматдан партияны бизни республикада тири волонтёрларына разылыкъ письмола келгендиле.

«Бирикген Эресей» политика партияны КъЧР-де регионал бёлюмюню Волонтёр аралыгъы 2020-чы джыл коронавирус инфекция кёбчюлюкге джайылыб баргъан кёзюуде джунчугъанлагъа болушлукъгъа къуралгъан эди. Андан бери аны къурамына кирген джердешлерибиз кеси разылыкълары бла сууаблыкъ ишлени бардыргъанлай турадыла. Ала, этген джумушлары ючюн, сый, бюсюреу да табадыла.
Ма кёб болмай, Волонтёрну кюнюне джоралаб, «Бирикген Эресей» политика партияны КъЧР-де регионал бёлюмюню волонтёрларына аталгъан джыйылыу болгъанды.
Джунчуулу джашагъанлагъа, къыйын болумгъа тюшгенлеге кеси разылыкълары бла болушуб тургъан адамлагъа анда кёб алгъыш этилгенди.
Сёлешгенле бары волонтёрла кеси разылыкълары бла пенсионерлеге, ветеранлагъа, кёб сабийли юйдегилеге болушханлай тургъанларын, пандемияны кёзюуюнде ала ауругъанланы юйлерине дарманла, ашарыкъ затла элтиб, госпиталланы джарашдырыргъа джараб тургъанларын чертгендиле.
Бусагъатда да волонтёрла къралыбызны джангы регионларына, Донбассха, спецоперацияны бардыра тургъан аскерчилеге гуманитар джюк джыйыугъа, ашырыугъа тири къошулгъанларын да айтхандыла.
«Бирикген Эресей» политика партияны КъЧР-де регионал бёлюмюню толтуруучу комитетини тамадасы Джамбаланы Руслан бла КъЧР-ни Граждан къоруулауну, чарпыуладан сакълауну эмда аладан джетген джарсыуну тюзетиуню хакъындан управлениесини тамадасы Алботланы Роберт эм тири волонтёрлагъа «Бирикген Эресей» политика партияны федерал дараджада башчылыгъындан, РФ-ны сенатору Салпагъарланы Ахматдан келген разылыкъ письмоланы бергендиле.
Ала къууанч джыйылыуда Медицина бла Технология колледжлени башчылыкъларын да саугъалагъандыла. Ол эки билим берген учреждениени студентлери партияны Волонтёр аралыгъыны Джаш гвардиячыларыны алчыларыдыла. Алагъа саугъагъа Салпагъарланы Ахмат спорт керекле, компьютер эмда оргтехника джибергенди.

СОЛТАНЛАНЫ З.