Къарачай-Черкес Республиканы бютеу районларында, бютюн да узакъ элледе джашагъанла, кеслерини эркинликлеринден, социал джаны бла мадарларындан толуракъ хапарлы болур ючюн, «Кърал юрист бюрону» юристконсультлары бла тюбешгенлей турадыла. Ол тюбешиуле адамла джашагъан элледе ётедиле.
Бу тукъум хакъсыз болушлукъ джунчуб тургъан адамлагъа этиледи: сакъатлагъа, ёксюз сабийлеге, Уллу Ата джурт къазауатны ветеранларына, къарыусуз джашагъан юйдегилени келечилерине.

Алайды да, юристконсультла, хар гюрге кюн сайын кабинетлеринден чыгъыб, адамла бла тюбеширге атланадыла. Джюрюген адетге кёре хар тюбешиуде 2-3 юристконсульт болуучанды. Ала, эки сагъатха ондан аслам адам бла тюбешиб, аланы сорууларына джууаб бередиле. Джылны ичинде юристконсультла республиканы хар районун тёрт кере джокълайдыла. Муниципал властла бюрону адамларына юрист болушлукъ эм бек керекли эллени кеслери билдиредиле.
Асламысына адамла законда белгиленнгенине кёре, не таблыкъ бла хайырланыргъа боллукъларын билирге излейдиле. Аны кибик турмуш, джашау болумларын игилендирирге тырмашадыла, джерге, мюлкге ие болууну джорукъларындан хапар сорадыла. Кимни болса да иши сюдге тюшсе да, юристконсультла, иш бир джанына болгъунчу, керекли болушлукъну табдыргъанлай турадыла.
Джылны аллындан бери бюрону къуллукъчулары 500-ге джууукъ адамгъа юрист болушлукъ этгендиле.