Къарачай-Черкесияны парламентарийлери Эресей Федерацияны Конституциясына этилген тюрлениулени керекли ишге санагъанларын билдиргендиле.

«Эресей Федерацияны Конституциясына этилген тюрлениуле къралны адамларын джакъларгъа, алагъа социал джакълыкъ этерге мадар берликдиле, - дегенди КъЧР-ни Халкъ Джыйылыууну (Парламентини) депутаты Артём Трифонов. – Республиканы джамагъатын, бир джанына турмай, чёб атаргъа чакъырама. Ким биледи, бизни джашауубузда аллай мадар энди болмазгъа да болур. Айхай да, ол бизни кесибизни социал джакълыгъыбызды.

Конституциягъа этилген тюрлениулени асламысы бюджетден берилген иш хакъгъа, къартланы пенсияларына эмда социал пособиелеге индексация этиуню хакъындандыла. Ол бары да джамагъатны эм къарыусуз, болушлукъ керекли къауумуна кёлтюргючлюкдю».

Депутат чертгенден, этиллик тюрлениуле власть бла джамагъатны арасында узакъ болджаллы кесамат джарашдырадыла. Ол кесаматда къралны социал борчлары кескин джазыллыкъдыла, властны органлары уа ол борчланы амалсыз толтурургъа керек боллукъдула.

Тюрлениуле этилген джангы Конституцияда саулукъ сакълаугъа, волонтёр къозгъалыугъа, тарихни сакълаугъа этиллик болушлукъ кескин джазыллыгъын да чертгенди депутат.

«Адамла кърал аланы не заманда да, къаллай болумда да болушлукъсуз къоймазлыгъын, керек кюнде не тюрлю джарсыудан да джакъларыгъын билирге керекдиле. Бизни заманда ол эм керекли затды. Къралны хар бир адамы да социал джакълыкъ табаргъа керекди», - деб къошханды Артём Трифонов.