КъЧР-ни Правительствосуну членлери Урупда тау-магъадан комбинатдан джез къазгъан, тазалагъан сагъатда, джараусуз болгъан  затла сакъланнган джерни джангыдан къалай джарашдырыб башлагъанларына къарадыла. Правительствону Председателини орунбасары Байчораланы Эльдар эмда мюлк джюрютюу бла джерлени хайырландырыуну министри Дмитрий Бугаев бу ишде этилген, этиллик затла бла шагъырей болдула.

Бусагъатда ары баргъан джолгъа зыгъыр къуюб, машинала бурулурча таблыкъланы этиб кюрешедиле. Алайы 17 гектардан артыкъ джерди. Не джаны бла да деменгили болур ючюн 115,942 минг кубометр зыгъыр, башха керекле тёшелликдиле. Сууну бир джанына бурургъа 700 метр узунлукъгъа арыкъ этилиб  бошалгъанды.
Бу объект тёртге юлешинибди. Биринчи кесеги быйыл бошаллыкъды. Къалгъан ючюсю да белгиленнген кёзюуледе, 2021-чи джылгъа дери, этиле барлыкъдыла. Алгъындан хайырлана тургъан, энди къошуллукъ джерлени да айтсакъ, бары да 56 гектаргъа джетедиле.
Былайда бир затны эсигизге салыргъа тыйыншлыды: озгъан джыл къыркъаууз (сентябрь) айда Къарачай-Черкесияны Башчысы Темрезланы Рашид, РФ-ны табигъат ресурсларыны министри Дмитрий Кобылкин бла тюбешген эди. Ол кёзюуде Темрез улу министрге, регионда экология иги болур ючюн, Урупда тау-магъадан комбинатха эс бёлюрге кереклисин айтхан эди. Андан сора бу иш «Экология» деген миллет проектге къошулгъан эди. Белгиленнген ишле заманында этиле барадыла.