Эресей Федерацияны Шимал Кавказны ишлерини хакъындан министри Сергей Чеботарёв кенгеш бардыргъанды.
Анда Шимал Кавказ федерал округда орналгъан айырылыб экономика магъаналы турист-рекреацион джерлени (ОЭЗ) айнытыугъа эмда аланы бюгюнлюкде къалай ишлегенлерине къаралгъанды.
Кенгешге РФ-ны Шимал Кавказны ишлерини хакъындан министрини биринчи орунбасары Одес Байсултанов, министрни орунбасары Ольга Рухуллаева, Къарачай-Черкес Республиканы Правительствосуну Председатели Аслан Озов, Чечен Республиканы Правительствосуну Председатели Муслим Хучиев, Терк Башы Тегей Республиканы Правительствосуну Председатели Таймураз Тускаев, Къабарты-Малкъар Республиканы Правительствосуну Председателини биринчи орунбасары Мурат Керефов, «Курорты Северного Кавказа» АО-ну баш директору Хасан Тимижев да къошулгъандыла.
Джыйылгъанла Къарачай-Черкесде орналгъан «Архыз», Чеченде «Ведучи» эмда Къабарты-Малкъарда «Эльбрус» курортлада айырылыб экономика магъаналы турист-рекреацион джерлени къурауну юсюнден сёлешинди. Терк Башы Тегейде «Мамисон» деген эмда Ингушда «Армхи» атлы курортланы да айнытыу джаны бла проектлени толтурулууларына къаралды.
Кенгешде айырылыб экономика магъаналы турист-рекреацион джерледе орналыргъа излегенлени табыб, аланы ишлерине кёз-къулакъ болургъа кереклисини юсюнден сёлешинди. ОЭЗ-леде ишлеген компанияла бла регионал властла къысха байламлылыкъ тутаргъа кереклилери да чертилди.
«Бизни къралда туризм эм магъаналы эмда дженгил айныб баргъан санагъатланы бириди. Бюгюнлюкде Шимал Кавказда «Архыз», «Эльбрус», «Ведучи» турист аралыкъла джетишимли ишлейдиле. Экономика, социал джаны бла уллу ёсюмлери барды, бизни къралда, тыш къраллада да алагъа уллу эс бёледиле. Бизни баш борчубуз, ол эс бёлгенлени не къадар кёллендирирге, разы этергеди», - дегенди Сергей Чеботарёв.
Ол чертгенден, Эресей Федерацияны Правительствосу Шимал Кавказ федерал округда туризмни айнытыуну хакъындан стратегияны къабыл этгенди. Ол Эресей Федерацияда туризмни айнытыуну 2035-чи джылгъа дери баш ишлерини бири боллукъду.
Кенгешни ишине къошулгъанла айырылыб экономика магъаналы турист-рекреацион джерлени къурауда тыйгъыч болгъан затланы, джарсыуларыны юсюнден сёлешдиле.
Шимал Кавказ федерал округда турист бирлешликни кенг белгили этер ючюн аланы джерлеринде джылны къайсы чагъында да бютеуэресей эмда халкъла арасы дараджалада спорт эришиуле бла табышлылыкъ ишле бардырыргъа деген оюм да айтылды кенгешде.
