Къарачай-Черкес Республиканы Башчысыны эмда Правительствосуну Администрациясыны Председатели Мурат Озов Наркотиклеге къаршчы комиссияны кенгешин бардыргъанды.
Кенгешни ишине Эресей Федерацияны Шимал Кавказ федерал округда Толу эркинликли келечисини Аппаратыны КъЧР-де баш федерал инспектору Игорь Дральщиков, КъЧР-ни Халкъ Джыйылыууну (Парламентини) Председатели Александр Иванов, шахар эмда район администрацияланы башчылары да къошулгъандыла.
Мурат Озов чертгенден, толтуруучу власть бла джорукъ сакълаучу органла эмда кеси оноуларын кеслери этген джергили органла джаш тёлю бла бирге наркотиклеге къаршчы ишлени таймаздан бардыргъанлай турадыла.
Бюгюнлюкде, эсеблеге кёре, наркотиклени хайырландырыу аз болгъанды. Озгъан заман бла тенглешдиргенде, аптекалада да, врач буюрмагъанлай, тюрлю-тюрлю эсиртген, ангыны тюрлендирген дарманланы сатылгъанлары тохтагъанды.
«Бюгюннгю сынамыбыз бла джетишимлерибиз Эресей Федерацияны наркотиклеге къаршчы политикасы бизге салгъан борчланы толусу бла толтурургъа себеб боллукъдула», - дегенди Къарачай-Черкес Республиканы Башчысыны эмда Правительствосуну Администрациясыны Председатели Мурат Озов.
Кенгешде Зеленчук районда наркотикле ичиб этилген аманлыкъланы санын азайтыугъа эмда наркотиклени джайыуну тыйыугъа Къарачай-Черкес Республиканы Ич ишлерини министерствосунда бардырылгъан ишлеге да къаралгъанды.
Кенгешде наркотикле бла байламлы аманлыкъла бла кюрешни джангы дараджагъа чыгъарыуну юсюнден да сёлешинди. Сёз ючюн, Къарачай-Черкес Республиканы Окъуу бла илму министерствосу, районла бла шахарланы администрацияларыны башчылары бла байламлылыкъда, республиканы устазларыны ичлеринден школлада наркотиклеге къаршчы пропаганданы бардырлыкъ усталаны хазырларгъа деб оноулашдыла.
Шахарла бла районланы администрацияларыны башчыларына наркотиклеге къаршчы волонтёр къауумланы къураргъа борч салынды. Ол къауумла джамагъатны ичинде наркотиклеге къаршчы ишлени бардырыргъа керекдиле. Алагъа «Общество без наркотиков» деген реабилитацион аралыкъ эмда Черкесск шахарны Наркотиклеге къаршчы комиссиясы да болушлукъ этерикдиле.
Аны кибик, Наркотиклеге къаршчы комиссияны кенгешинде «Кавказское здоровье детям» проектни толтурулуууна, Къарачай-Черкесияда волонтёр къозгъалыуну къураугъа эмда Къарачай районда наркотиклеге къаршчы этилген ишлеге да эс бёлдюле.
«Кавказское здоровье детям» деген проект 2018-чи джыл къуралыб, 2019-чу джыл толтурулуб башлагъанды. Ол Къарачай-Черкес Республиканы джамагъатыны арасында наркотиклени хайырландырыуну азайтыргъа деб къуралгъанды. Аны «Общество без наркотиков» деген реабилитацион аралыкъ Президент грантланы фондуну, КъЧР-де Наркотиклеге къаршчы аппаратны эмда КъЧР-ни Урунуу бла социал ёсюмюню министерствосуну болушлукълары бла джарашдыргъанды. Алагъа методика болушлукъ Дондагъы Ростовда «Донской антинаркотический фронт» деген коммерциясыз бирлешлик этгенди.
Проектни нюзюрю: республикада ёсюб келген джаш тёлю наркотиклени хайырландырмазча профилактика ишле бардырыуду. Бюгюнлюкде проектни тамалында 103 профилактика эмда окъуу иш бардырылгъанды.
«Къарачай-Черкесияда «Кавказское здоровье детям» проектни хайыры уллу болгъанды. Профилактика ишле, къралыбызны башха регионларындан устала бла байламлылыкъ, министерствола бла ведомстволаны биригиб ишлегенлери республикада наркотикле хайырландыргъанланы санын азайтыргъа себеб боладыла», - дегенди «Общество без наркотиков» деген реабилитацион аралыкъны баш директору Виктор Страх.
Ол айтхандан, бюгюнлюкде реабилитацион аралыкъ наркоманияны профилактикасыны социал проектин джарашдырыб кюрешеди. Проект къуру школланы сохталары, аланы ата-аналары, устазлары бла къалмай, орта эмда баш билим берген окъуу заведениелени окъуучулары, устазлары бла да ишлерикди. Тюрлю-тюрлю тюбешиулени, профилактика ишлени аслам этер мурат барды. Республиканы адамлары наркотиклени хайырландырыуну зараныны юсюнден не къадар хапарлы болур ючюн, аны эм узакъда орналгъан эллерине да барыб, джамагъат бла тюбешиуле къураргъа керекди. Аны ючюн а не къадар аслам волонтёр хазырларгъа дурусду.
Аны бла байламлы Виктор Страх Къарачай-Черкес Республиканы эм уллу районларында волонтёр къауумла къуралсала иги боллугъун билдиргенди.
