Къарачай-Черкес Республиканы Правительствосуну Председатели Аслан Озов, Къобан, Къарачай, Гитче Къарачай, Джёгетей Аягъы муниципал районлагъа айланыб, окъуу-билим берген организациялада «Точки роста» деген окъуу аралыкъланы къурау къалай баргъаны бла шагъырей болгъанды.

Бюгюнлюкде окъуу аралыкълагъа керекли мебелни алыу, ала орналлыкъ мекямланы джарашдырыу къызыудады.

Аслан Озов хар баргъан джеринде бу ишге уллу эс бёлюрге кереклисин, не тукъум джумушдан да заманында къол айырыргъа тыйыншлысын эсгертгенди. Окъуу аралыкъла барысы да бир кюн, къыркъаууз (сентябрь) айда, эшиклерин ачаргъа керекдиле.
Алгъаракъда айтылгъаныча, «Окъуу» деген миллет проектни «Бюгюннгю школ» деген федерал проектин джашаугъа сингдириу бла байламлы джангы окъуу джылны аллында Къарачай-Черкесияны 10 муниципал районунда «Точка роста» деб 19 окъуу аралыкъ ачыллыкъды.
Проектге кёре «Точка роста» деген цифралы эмда гуманитар шекелли окъуу аралыкъ эл школлада материал-техника базаны, устазланы билимлерин игилендириу, билим берген санагъатха джангы, файдалы джорукъланы сингдириу, «Технология», «Математика и информатика», «Физическая культура и основы безопасности жизнедеятельности» деген дерслени терен ангылатыу бла байламлы боллукъду.